PINGARATES LLITERARIES: YO CONFIESO (Jaume Cabré. Destino, 2011)

A pidimientu de los blogueros, abrimos esti miércoles 16 de payares, con una periodicidá selmanal, un nuevu espaciu pa dar cabida a llibros, cómics, películes, …fechos en llingües minorizaes o que tengan rellación con elles. Too ello abiertu a cualesquier suxerencia o comentariu que vos preste espeyar equí.

Entamamos col caberu llibru del barcelonés Jaume Cabré, Yo confieso (Destino, 2011), escritu en catalán, del que tenemos disponible la so torna en castellanu.
De magar el títulu, que se siente un migayu “vieyunu de cures y monxes” y les sos 860 páxines de les que se compón, pue echanos p’atrás nun primer contautu, merez la pena l’intentu. Ye un novelón con mayúscules, d’esos llibros que t’engancha y nun pues parar hasta finar.

Un vigulín de coleicionista ye’l filu conductor que nos fae viaxar per una Europa chiscada d’hestories de muertes ya inxusticies: la Inquisición, el nazismu y la segunda guerra mundial, la Cataluña franquista,…Demientres pasamos páxines, vamos xorreciendo xunto al protagonista, Adrià Ardèvol un neñu intelixente y con una llamativa capacidá pa deprender llingües: catalán, francés, castellanu, alemán, italianu, inglés, rusu, araméu, llatín, griegu, neerlandés, rumanu, hebréu... Que vive nun entornu familiar mui solitariu centráu nuna tienda d’antigüedaes, propiedá de la so familia.
Son tantos personaxes ya hestories entemecíes na novela, que al final del llibru l’autor amesta una rellación colos Dramatis personae que van apaeciendo, y que pa los más despitaos va echanos un gabitu y facilitar la so llectura.

Yo confieso ye una novela abegosa de lleer nel autobús o nel tren pa dir a trabayar porque tien “un pesu considerable” pa metela en bolsu, pero que ye perfayadiza pa caltriar y esfrutar de les sos páxines nel sofá llariegu nuna tarde d’orbayu serondiega.

www.jaumecabre.cat