La Xunta Elleutoral bloquia les papeletes n'asturianu

Les papeletes elleutorales d’Andecha Astur pendientes de la decisión de la Xunta Elleutoral Provincial por tar en llingua asturiana. En 2008 la formación soberanista validó ensin problema dengún les papeletes n'asturianu.

Les papeletes al Congresu y al Senáu presentaes por Andecha Astur pa la so validación foren paralizaes a la espera de la decisión de la Xunta Elleutoral provincial, que tien de decidir si’l fechu de tar presentaes en llingua asturiana pue xustificar la so anulación. Andecha Astur vien calteniendo en toles elleiciones una coherencia llingüística que la llevaren n’ocasiones a quedar fuera de les convocatories elleutorales pola utilización del asturianu, fasta qu’a la fin, nel añu 2.000, consiguió ganar énte’l Tribunal Costitucional español que reconoció’l drechu a utilizar la llingua asturiana. De magar entós non solo presentare tola documentación en llingua asturiana dafechu, sinón que consiguió validar les sos papeletes elleutorales tamién n’asturianu.

Por embargu, "l’anormalidá democrática que se carez n’Asturies, au la nuesa llingua nacional continúa ensin ser reconocía oficialmente, propicia situaciones como la d’anguañu, na que cabe la posibilidá de que se vulneren los nuesos llexítimos drechos a concurrir a estes elleiciones prohibiéndomos l’usu de la nuesa llingua y obligándomos a una nuea batalla llegal" denuncia Andecha qu'esplica que nel meyor de los casos la paralización "yá supunxo un importante prexuiciu pa la nuesa campaña elleutoral, darréu que la paralización del procesu de validación de les papeletes yá provocare serios problemes nel normal desendolcu de la nuesa campaña elleutoral, yá que complicará en gran midía que les nueses papeletes puean llegar a tiempu a los elleutores".

Andecha Astur reitera la necesidá de que se normalice la situación llingüística n’Asturies, "cola democrática reconocencia de la nuesa llingua comu únicu mediu posible pa garantizar los drechos y llibertaes del Pueblu Asturianu y finar d’una vegada con estes antidemocrátiques espresiones de represión llingüística".

Fonte: Infoasturies