PINGARATES LLITERARIES: DIR PA ESCUELA 1925-1975 (Coord: Miguel Rojo) 2008, Ed. Ámbitu

Agora col cambéu políticu, de xuru, el sofitu pa con una escuela pública torna ser protagonista de los alderiques na cai. Poro, la llectura d’esti llibru Dir pa escuela va servinos a unos na alcordanza de lo que fuera la escuela acullá, y a otros pa deprender lo muncho que camudara’l sistema escolar. Y pa toos, camentar cuálu ye’l llugar que-y correspuende a la educación infantil y cuálos son los pegoyos que necesita pal so sofitu.

Esti llibru, de mui fácil llectura, ta encadarmáu en veinticinco capítulos. En caún d’ellos apaez una figura relevante pa cola lliteratura n’asturianu, toos ñacíos enantes de 1970: Nené Losada Rico, Vicente García Oliva, Milio del Nido, Carmen Gómez Ojea,…y asina hasta algamar los 25 autores. Van cuntando lo que fuera pa con elli esa primer infancia. Lo que-yos fadiaba, lo que más-yos prestaba, los collores, golores y tastos que-yos traen na alcordanza, les sos esperances, los sos temores, los sos mayestros y mayestres, los sos primeros xuegos y pelees colos collacios,..
Amás, cada capítulu ta acompangáu d’una semeya del autor o autora en blancu y prietu, de cuando diba a la escuela. Que faen un perguapu llibru con una edición mui curiada.

Y pa finar, y pa qu’entren más ganes de lleelu, el restruxu’l llibru que diz asina:

“Dende’l pizarrín o’l tinteru a los bolis y los cachadores, dende’l lleche en polvo venío d’América a les Porres de Kojak o los cromos de la seleición, dende la Enciclopedia Álvarez a les fiches, dende’l “¡Presente!” y la verdiasca hasta los primeros rellumos de pedagoxíes más amables…”