L'asturianu carez la situación de RTPA

DAMIÁN BARREIRO. UVIÉU
La situación que vive l'Ente de Comunicación y, en concreto, la RPA, va facer que la programación n'asturianu vaiga a menos. Asina, l'espaciu deportivu ¡Acuto!, presentáu por Carlos Suari, ye'l primeru nesta llingua que va desaparecer de la programación de la radio pública. Suari llegó a un alcuerdu cola productora Ten con Ten pa dexar preparaos tolos ¡Acuto! d'equí a la fin d'añu, pero yá ensin conteníos d'actualidá nin entrevistes. Esti mesmu 3 de payares, el presentador grabó l'últimu espaciu.

El programa emítese tolos domingos a les 14 hores y ta dedicáu a falar de les dances, los bailles, los xuegos y los deportes tradicionales d'Asturies. Según afirma'l presentador, l'impagu de les factures, la inseguranza y la falta de comunicación y apoyu dexa a los proveedores en mui mala situación, «creo que tovía peor que la que viven los trabayadores, porque nós nun tenemos contratu nin sindicatu que nos apoye, pero sí obligaciones tributaries y responsabilidaes morales que pesen como llábanes».

Pel momentu, Suari va siguir presentando A galmiaes en TPA, porque pel momentu, l'espaciu onde s'inclúi –Al Aldu– va siguir n'emisión. Sicasí, el presentador esplica que munchos collaboradores de la casa yá tán pensando en reducir la collaboración o rescindila porque creen, «polo menos nel mio casu», que tán faciéndolos responsables d'una situación «na que los que tenemos menos marxe operativu y reivindicativu somos nós, los collaboradores».

Asina, esplica que quiciabes l'audiencia nun sabe que bona parte de la programación sal pol trabayu de los collaboradores, «que nun somos del cuadru de personal nin tampoco emplegaos de les productores privaes», y añade qu'Al Aldu presenta les mesmes dificultaes que los demás programes de la RTPA, «onde cada collaborador va decidir hasta ónde llega la so paciencia».

Fonte: Les Noticies