7/7/11

Denuncien torgues pa escolarizar n'infantil y primaria n'asturianu


El sindicatu SUATEA fizo llegar a los medios la denuncia de l’asociación de padres y madres del Colexu d’Educación Infantil y Primaria Tremañes, en Xixón. Esti centru escolarizó l’asignatura de Llingua Asturiana nel Segundu Ciclu d’Educación Infantil polo menos dende’l cursu 2002-2003 fasta’l cursu 2007-2008, incluyíos. Según despliquen los padres d’esti colexu “nos cursos 2008-2009 y 2009-2010 el Colexu caltuvo esta asignatura namás en Primaria, porque la Conseyería nun reconoció l’horariu suficiente pa que’l mayestru la materia la impartiese tamién n’Infantil”. Esti situación solucionárase nel cursu 2009-2010, “por fin, el Colexu pudo recuperar la normalidá nesti aspeutu, tornando impartirse Llingua Asturiana en toles estayes educatives; pa ello cuntó con una mayestra que compartía’l so horariu de trabayu col CEIP de Xove”.
El problema vien cola plantía anunciada pola Conseyería d’Educación pal cursu 2011-2012 que según despliquen “contempla un solu mayestru p’atender la escolarización d’asturianu en tres Colexos: Tremañes, Xove y Honesto Batalón”. De facese realidá esti endurecimientu les condiciones, los padres anuncien “qu’obligaría a qu’otra vuelta les families d’Educación Infantil de Tremañes nun puedan exercer el so drechu estatutariu a que los sos fíos cursen esta materia”.
Según estos mesmos padres “la Conseyería sabe perbién que la escolarización de la Llingua Asturiana en tola ufierta educativa del Centru (Infantil y Primaria) figura nos sos documentos oficiales (PEC, PXA) y que cunta col sofitu de tolos sos muérganos de gobiernu”, amás recuerden qu’esta escolarización “cuntó siempres col decidíu sofitu de tola Comunidá educativa y, cimeramente, col de les families, como amuesa’l fechu de que cuasi’l 100% del escolináu d’Educación Infantil curse davezu esta materia”.
Pa la organización de padres y madres d’esti colexu “los cambeos previstos na plantía pal prósimu cursu asitíense ñidiamente fora’l marcu llegal afitáu pa la escolarización de la nuesa llingua” yá que, recuerden, “la Llei 1/1998, de 23 de marzu, d’usu y promoción del Bable/Asturianu, nel so artículu 9, afita que’l Gobiernu asturianu “asegurará la enseñancia’l bable/asturianu y promoverá’l so usu nel sistema educativu”, mentres que l’artículu 10 diz que’l Gobiernu d’Asturies “garantizará l’enseñu’l bable/asturianu en toles estaes y graos”.
Amás ponen como exemplu la sentencia 1770/09 dictada, n’avientu de 2009, pol Tribunal Superior de Xusticia d’Asturies, que reconoció dafechamente que les enseñancies de Llingua Asturiana tán recoyíes nel currículu’l Segundu Ciclu d’Educación Infantil, reguláu pel vixente Decretu 85/2008, de 3 de setiembre (BOPA nu 212, del 11 de setiembre de 2008).

Dende l’asociación de padres y madres reconocen que’l CEIP Tremañes “cumplió cola so obligación d’ufrir a toles families d’Educación Infantil la opción de cursar estudios de Llingua Asturiana nesta estaya” y recuerden l’ésitu de la convocatoria “cuasi’l 100 % de les families optan voluntariamente por esa ufierta formativa”, polo que son munchos padres los que se ven “agravaos pol fechu de qu’unos años los sos fíos pueden estudiar esta materia y otros años la Conseyería d’Educación tórga-yos esi drechu, al ñega-yos el profesoráu necesariu”.
Califiquen esta situación de “grave” y piden a la Conseyería d’Educación que proceda a garantizar “el drechu que les nueses families tienen a que les sos fíes y fíos estudien asturianu en toles estayes educatives del CEIP Tremañes”. Pa garantizalo, afirmen “a l’Alministración abasta-y con asegurar un mayestru qu’imparta esta materia nos Colexos Tremañes y Xove”.

Fonte: Asturnews

6 comentarios:

  1. Ye la verdaera realidá de la situación cola llingua asturiana y el so enseñu nesti centru que cada añu tien más matrícula pola afluencia de munches families que moren nas urbanizaciones y dellos edificios de nueva construcción nel perguapu entornu'l colexu públicu Tremañes y de la plaza María Teresa González, y el perbon y abnegáu trabayu del so profesoráu durante munchos años. Paez que'l recorte presupuestario perxudica más a los centros de los barrios periféricos y nun tien que ser asina porque en xusticia son los que más lu necesiten.

    ResponderEliminar
  2. mayestra d'asturianu7 de julio de 2011, 23:46

    Ya tamos otra vegada colos recortes en Educación pal asturianu. Si l'amigu Herminio Sastre va largase ¡ya! con vientu frescu ¿pa qué se mete en debuxos tan comprometíos y perdifíciles pa él estropiando lo que ta bien fechu? estoso sociatas nun tien remediu, tan declaraos escontra'l asturianu dende va munchos años.

    ResponderEliminar
  3. Amadeo, barriu Tremañes9 de julio de 2011, 11:38

    Hai que apoyar l'enseñu públicu, una de les maneres ye nun recortar o quitar les hores del profesoráu de llingua nos colexos públicos como ye'l casu de los tres centros nomaos enrriba ye dicir Tremañes, Xove y Honesto Batalón. El psoe paez que pertenez a un colectivu de la Iglesia o de los colexos concertaos/privaos, too lo contrario a que tien que ser y parecer. Oficialidá darréu.

    ResponderEliminar
  4. N'Asturies ta claru que la enseñanza pública ye la meyor con gran diferencia, a pesar de la Conseyería d'Educación del PSOE nestos últimos años del reináu oligárquicu de Areces y les sos retayos drásticos escontra'l enseñu del asturianu nos centros de Ed. Infantil, na Ed. Primaria, y entá ye más na ESO.

    ResponderEliminar
  5. La llingua col Foro...?11 de julio de 2011, 14:26

    Hai qu'esperar enforma del Foro en materia d'educación porqu'el segundu d'abordu y manu drecha de Cascos ye Enrique Sostres que fue foi inspector xefe y l'home de pesu na Conseyería d'Educación col PP va unos años, y conoz perbién de lo que va l'asuntu anque nun ye bien dáu a l'asturianu. Pon la oreya, hermanos...

    ResponderEliminar
  6. Bé, això és el bilingüisme ben entès que us imposen els monolingües.

    ResponderEliminar

Los comentarios tán pendientes de moderación. Espublizaránse lo primero dable.