Alcuentru de Mocedá Europeo Falante de Llingües Minorizaes

Xunta Moza participa nel Alcuentru de Mocedá Europeo Falante de Llingües Minorizaes.

La mocedá de la XPDLLA, Xunta Moza, tuvo representando a los xóvenes falantes asturianos nel Alcuentru Internacional de Mocedá Europeo Falante de Llingües Minoritaries/Minorizaes, celebráu na ciudá vasca de Gasteiz. Amás de los representantes asturianos, tuvieron mozos falantes de vascu, bretón, corsu, gallegu y catalán.

Los representantes de Xunta Moza pudieron certificar nesti actu que “mientres que la mocedá d’otres comunidaes peninsulares tienen garantizada, por exemplu, la educación de y na so propia llingua, n’Asturies siguen ensin respetase nin garantizase unos drechos mínimos que permitan la supervivencia del idioma y que protexan a los falantes de la llingua minorizada”. Una situación que dexa a los asturianos como “ciudadanos de segunda”, afirmen.

Nel Alcuentru ellaboróse y firmóse un manifiestu robláu por tolos participantes:

Manifiestu de la mocedá poles llingües – Vitoria-Gasteiz 2011

Mocedá falante de llingües minoritaries y minorizaes d’Europa aconceyámonos en Vitoria-Gasteiz ente los díes 19 y 22 de xunetu del 2011, y alcordamos:

1) Toles llingües son iguales por naturaleza y, por ende, toes deben tener los mesmos drechos y deberes, y les mesmes oportunidaes d’usu.

2) Les nueses llingües conformen la nuesa identidá y, por ello, nun vamos renunciar a elles y adoptar formes de pensamientu únicu. La nuesa riqueza ye la nuesa identidá.

Les nueses mas y pás dexáronnos la meyor de les herencies, un patrimoniu cultural y llingüísticu al que nun vamos a arrenunciar, per contra, va ser la riqueza que dexemos a xeneraciones futures.

3) Comprometémonos a utilizar, defender y potenciar les nueses llingües en tolos ámbitos de la vida. Amás, comprometémonos a allegar los nuestros idiomes a aquelles persones que nun los conocen y xenerar actitúes positives p’haza ellos.

4) Demandamos a les autoridaes la reconocencia llegal de toles llingües en condiciones d’igualdá. De la mesma manera, la defensa y promoción de tolos idiomes, el drechu a una Educación íntegra nes nueses llingües y la esistencia d’unes polítiques llingüístiques qu’aseguren l’usu en tolos ámbitos.

Defendemos l’intercambiu llingüísticu y cultural porque les nueses llingües contribúin a la sostenibilidá y a la bayura mundial, sumen y non resten.

Somos el futuru.

Les nueses llingües son el futuru.

El futuru escomienza güei.

Fonte: Asturnews