Cascos desendolcará normativamente la Llei d'Usu del Asturianu

DAMIÁN BARREIRO. UVIÉU -
Nel pasáu debate d’investidura, Francisco Álvarez-Cascos, presidente nuevu d’Asturies, comprometióse a «desarrollar» la Llei d’Usu y Promoción del Asturianu de 1998. Estes pallabres nun paecen dir muncho más allá de les de los dirixentes de la FSA, que siempres punxeron como tope de la so política llingüística l’articuláu d’esta Llei. Pero amás d’esi compromisu de cumplir cola llexislación, hai una diferencia nominal nes pallabres de Cascos: mentes que dende’l PSOE siempres dixeron «aplicar» la Llei d’Usu, Cascos faló de «desarrollar», lo que pue entendese como que’l Gobiernu de Foru Asturies va dir más allá del articuláu actual y amplialu al traviés de normes de rangu menor.

Polo menos, los espertos asina lo entienden: «Desendolcar una llei significa llevala más allá de lo que yá existe», desplica Nicolas Bartolomé Pérez. Esti abogáu y miembru de l’Academia de la Llingua opina qu’esta norma necesitaría concretase al traviés de reglamentos que dean seguranza xurídica y permitan avanzar nel procesu de normalización, «qu’a la fin ye l’espíritu de la Llei». El xurista esclaria que toles normes necesiten un desarrollu, «y más esta, que tien un articuláu ambiguu y dexa too en manes de la voluntariedá de l’Alministración».

Desenvolvimientu llegal
De momentu, les úniques midíes que surdieron de la Llei d’Usu foron los decretos que regulen el procesu de fixación de la toponimia y los qu’aprueben los currículos d’asturianu na ESO y Bachilleratu, anque estos últimos interpretaos de manera restrictiva. Asina, onde la Llei fala de voluntariedá, los decretos establecen la optatividá. Otra manera, el Plan de Normalización 2005-2007 tomó como ún de los sos referentes esta Llei. Bartolomé Pérez esplica que más que planes de normalización, «qu’a la fin nun se cumplen», la cuestión sedría reglamentar la presencia del idioma na Educación y na Alministración, «dos de los pegoyos fundamentales d’un procesu de normalización llingüística».

El xurista desplica que l’usu del asturianu énte l’Alministración ye dalgo que permite la Llei, «pero fasta’l momentu siempres tuvo una interpretación restrictiva». Pa esti abogáu, ún de los aspectos fundamentales a la hora de normalizar una llingua ye que tolos ciudadanos que quieran usala puean facelo en llibertá, «pero surde un problema si nos alcontramos con funcionarios reticentes». José Manuel Pérez, espertu en temes llingüístico-llegales, comenta que pa iguar estos conflictos podría facese un decretu que regulara l’usu nos rexistros: «Tendría que recoyer si tien qu’haber solicitúes billingües en toles Conseyeríes o si la rempuesta alministrativa pue dir nos dos idiomes, anque a efeutos llegales namás tenga validez en castellanu».

Fonte: Les Noticies