9/10/15

Iniciativa pol Asturianu viaxa a Bucarest a la Xunta Xeneral d’ELEN


Iniciativa viaxa a Bucarest a la Xunta Xeneral d’ELEN
La Rede Europea d’Igualdá de Llingües (ELEN) celebrará la so Xunta Xeneral en Bucarest, Rumanía, el sábadu 10 d’ochobre, organizada pol Conseyu d’Aromunes ya Iniciativa pol Asturianu tará presente.
Xosé B. Álvarez, responsable de Rellaciones Internacionales d’Iniciativa pol Asturianu tará representando a la organización y presentará los caberos problemes que vien careciendo la llingua asturiana y la so comunidá falante, asina como la repercusión de la nuesa presencia nes Naciones Xuníes. La Xunta Xeneral cellebraráse nel Hotel Royal Bucharest.
Los delegaos que representen a los falantes de llingües minoritaries d’Europa aconceyarán esta fin de selmana na capital rumana p’aldericar munchos de los temes vitales qu’afeuten a les sos llingües y cómo ELEN trabayará xunto coles sos organizaciones miembru nos ámbitos llocal, nacional y internacional.
El Presidente del Conseyu d’Aromunes, Niciolas Caracota, desplicó hai poco los oxetivos d’esa xunta na que se falará sobremanera del so pueblu: “Unu de los oxetivos de la Xunta Xeneral d’ELEN sedrá sobre la situación de los Aromunes, que s’enfrenten a numberosos retos en dellos estaos de la XE, incluyendo la falta de reconocencia per parte de Rumanía y la falta xeneralizada de provisión d’escolarización media y de medios en fala aromuna.Organizaciones aromunes de Rumanía, Serbia, Macedonia, Bulgaria, Albania y Grecia contribuirán nel alderique“.
“Delegaos d’ELEN y convidaos de toa Europa viaxarán pa escuchar una amplia gama de presentaciones sobre llingües europees minorizaes”, dixo’l Secretariu Xeneral d’ELEN, Davyth Hicks. “Éstes inclúin el nuevu proyeutu de Protocolu del idioma p’afitar un nuevu estándar llegal pa los drechos llingüísticos dirixíos pelos nuesos miembros vascos Kontseilua, el recién informe d’ELEN nes Naciones Xuníes sobre discriminación llingüística nel Estáu español, les prósimes manifestaciones pola llexislación llingüística y la igualdá de estatus pal bretón, l’occitanu, l’alsacianu, el corsu, el vascu y el catalán nel Estáu francés el 24 d’ochobre, les nueses actividaes col Conseyu d’Europa, el Parllamentu Européu y la Comisión, el drechu a la educación media en gaélicu, la promoción del irlandés y el galés, del húngaru en Rumanía y Eslovaquia y el nuevu Proyeutu de Diversidá Llingüística Dixital d’ELEN, financiáu pola XE, que tien l’oxetivu d’aumentar la cantidá de conteníu dixital online nes llingües minorizaes y en peligru de desaniciu. ”
ELEN ye una ONG a nivel internacional que trabaya pola promoción, proteición y revitalización de les llingües minorizaes. Representa 44 comunidaes llingüístiques en 18 estaos europeos. Iniciativa pol Asturianu ye miembru de plenu drechu de la organización, en representación de la llingua asturiana.
Fonte: Asturnews

5 comentarios:

  1. Tou un finxu: ELEN ye una ONG a nivel internacional que trabaya pola promoción, proteición y revitalización de les LLINGÜES MINORIZAES (tamién l'asturianu) y representa 44 comunidaes llingüístiques en 18 estaos europeos,

    ResponderEliminar
  2. Inaciu Galán ye un fenómenu, ta en tou. Con unos pocos asina n'Asturies yá fai enforma tiempu que gociaríamos d'oficialidá.

    ResponderEliminar
  3. Un pasu más pal algame la oficialidá.

    ResponderEliminar
  4. Anque'l problema de la llingua tenemos que solucionalo equí en Asturies, l'espardimientu de la llucha po la defensa de la llingua asturiana nesti casu a nivel européu nun ta de mas ye importante.

    ResponderEliminar

Los comentarios tán pendientes de moderación. Espublizaránse lo primero dable.