7/10/15

“Ye fundamental que se cumpla l’usu de la toponimia oficial”, afirma Padilla

Naciu Varillas entrevistó al Direutor Xeneral de Planificación Llingüística y Normalización en ‘Naguando’.
Na semeya, Fernando Padilla Palicio

 Fernando Padilla trató col periodista responsable d’esti espaciu de ‘El tren de RPA’ sobre cuestiones d’actualidá en referencia a la llingua asturiana. El cumplimientu de la Llei d’Usu, la especialidá, l’usu de la toponimia o la presencia del idioma nos medios de comunicación públicos y privaos tratáronse, ente otros asuntos, nesta entrevista de casi venti minutos de llargor. Asturies.com ufre una esbilla de les declaraciones más destacaes del direutor xeneral nuevu responsable de la política llingüística.
 -“El conseyeru y yo tenemos un perfil d’asturianistes moderaos, los dos, y coincido con él en que la situación ideal pa la llingua ye la cooficialidá, pero nes circunstancies actuales eso se nos escapa a la conseyería. Tenemos un marcu de referencia que ye la Llei d’Usu que se puede desarrollar muncho tovía, muncho más de lo que se desarrolló, como un desarrollu reglamentariu”.
 -“Nun hebo mala voluntá por parte del direutor del centru Emilio Alarcos, col que falamos inmediatamente, sinón una mala interpretación de la norma. En menos de 24 hores solucionóse’l tema. Cuando suceden estes coses tamos sollertes y intentamos solucionalo lo más rápido posible. Hai veces que nun nos lleguen les denuncies o malos entendíos. Cuando nos lleguen, si ta dientro de lo llegal, solucionámoslo seguro”.
 -“El conseyeru tuvo una xunta col ministru, que se comprometió, primero personalmente y llueu nuna xunta con tolos representantes de les comunidaes autonómes, a tratar el tema específicu de la especialidá de la Llingua Asturiana. Nesi camín vamos siguir hasta dar con ello y pienso que podemos consiguilo nesta llexislatura. Igual soi un poco optimista, pero danse les circunstancies pa que se pueda consiguir”.
El periodista Naciu Varillas
- “El cambiu de nome de la direición xeneral nun ye nada inocente. Esta modificación y el fechu de que nun dependa de nadie, sinón del propiu conseyeru d’Educación, ye una intención clara y decidida a impulsar el procesu de normalización llingüística, de difusión, promoción y dignificación de la llingua asturiana”.
 - “No que queda d’añu vamos a iniciar l’espediente de toponimia d’ocho conceyos. La idea ye acabar nesta llexislatura, o incluso en menos de dos años si se ye posible, los espedientes de toponimia que se puedan, y lo más fundamental, que se cumplan. Tovía tuvi reuniones col conseyeru de Presidencia y el d’Educación pa facer tolo posible pa qu’esa toponimia oficializada y espublizada nel BOPA se cumpla. Cuando se manden los correos, en cartelos, en rotulación… Too lleva tiempu”
- “Ye verdá que nun se ta utilizando la toponimia oficializada, pero tamos nello. Hai un compromisu claro d’avanzar nesi sentíu. Queremos renovar un conveniu col Gobiernu central pa que nes carreteres estatales y estaciones de tren se cumpla la toponimia oficializada”.
 - “El conseyeru yá comentó que nun-y gustaba nada que l’asturianu s’emplegase sólo en plan folixa y n’ámbitos coloquiales nel ente públicu de comunicación. La idea ye, cuando se forme’l nuevu ente, falar cola direición de la RTPA y proponer que se faga un usu normalizáu de la llingua asturiana. ¿Cómo podía ser? La nuesa intención ye que se faga dalgún tipu de magazine, d’informativu, programes infantiles… Que s’utilice la llingua como llingua de cultura, pa falar de too. En llingua asturiana pue falase de matemátiques, de política esterior, de deporte, de política llocal… Pue falase de too, non sólo del asturianu n’asturianu”.
 - “Tengo la idea de cambiar les condiciones de les subvenciones a medios de comunicación privaos. Si falamos de normalizar l’usu de la llingua asturiana y gallego-asturiano ye utilizalo como llingua de cultura, pa falar de lo que pasó en Ribeseya, nun partíu de nun sé qué o pa facer un comentariu de política nacional… Normalizar l’usu de la llingua asturiana. Nesi sentíu yo pretendo que nes condiciones se recueya específicamente eso, non falar n’asturianu del asturianu”.
- “Vamos siguir cola política de subvenciones a los Servicios de Normalización Llingüística, que nun son sólo responsabilidá del Principáu, sinón tamién de los conceyos”.
 - “La mio rellación, y la del conseyeru, cola Academia de la Llingua ye escelente. Ye una institución que depende del Principáu d’Asturies con un llabor fundamental, que se-y reconoz, y que tendrá unos oxetivos determinaos. Ye evidente que l’Academia va plantegar les coses que tien que plantegar, pero les rellaciones a día de güei, y espero que sigan asina, son escelentes”.
 - “La idea nesta llexislatura ye trabayar en tres exes fundamentales. Meyorar el sistema educativu, que se pue meyorar. Ta esparcío perfectamente en tola enseñanza pública, avanzando cada vez más na enseñanza concertada. De fechu, esti añu me paez qu’hai 400 alumnos más en Primaria na enseñanza concertada. Intentar consiguir la especialidá del profesoráu. Que l’asturianu tenga reconocimientu européu con otres llingües… Eso n’Educación.
 En medios de comunicación, como ya comenté, facer normal l’emplegu de la llingua asturiana, fundamentalmente na TPA y na RPA.
 Y l’usu institucional de la llingua. Meyorar y tornar al asturianu les páxines web y collaborar con toos aquellos entes, tanto públicos como privaos, pa puxar y meyorar el procesu de normalización llingüística”.                                                                          Fonte. asturies.com

5 comentarios:

  1. Està molt bé que s'aprofiti la llei d'Usu al màxim que es pugui, a falta de cooficialitat.

    El que no em sembla bé és aquesta sensació de normalitzar la toponímia però "sense presses". A Catalunya es va normalitzar la toponímia en no gaire més de dos o tres anys. Igual com els nomenclàtor de carrers i places. Si l'ALLA té els topònims normalitzats, s'apliquen i punt.

    Sí que és cert que després la normalització en carreteres o ferrocarrils és més lenta i complicada.

    ResponderEliminar
  2. Verdaderamente, asina ye y asina se debe proceder tamién n'Asturies.

    ResponderEliminar
  3. L'ALLA tien el corpus toponímicu pero'l problema ye que han aprebalu los conceyos colo que depende de los acuerdos políticos, a vegaes mediatizaos pola prensa españolista que carecemos. Amas, el PSOE nun tien priesa enxamás nesta materia...

    ResponderEliminar
  4. Nestes circunstancies el Psoe ta encantáu y feliz.

    ResponderEliminar
  5. Y dalgunos partidos más, tamién.

    ResponderEliminar

Los comentarios tán pendientes de moderación. Espublizaránse lo primero dable.