López afala a les families pa que’l “Día de la Reciella seya tolos díes del añu”

por Pablo R. Guardado 

La conceyala d’Educación y Cultura de Xixón acompañó nel actu de presentación d’esta xornada a Alberto Fidalgo, de ‘Reciella. Families pol Asturianu’. Va celebrase esti domingu nel Muséu del Pueblu d’Asturies con delles actividaes programaes.

Ana Montserrat López Moro emponderó en primer llugar el llabor de Reciella, asociación que tien como finxos “la tresmisión xeneracional del asturianu nel ámbitu social y familiar” y cola col Conceyu de Xixón vien collaborando nos años últimos, pa depués enumerar estes iniciatives conxuntes, que van continuar nesti cursu. “Animamos a les families a usar l’asturianu en toles situaciones y en tolos momentos, porque ellos son el futuru del asturianu. Que’l Día de la Reciella seya tolos díes del añu”, destacó la edil.

Pela so parte, Fidalgo apuntó que’l III Día de la Reciella “vien enlleno d’actividaes, con un programa que nun va defraudar”, y definiólo como “un día pa que les families asturianes disfruten d’un tiempu d’ociu n’asturianu colos sos fíos y les sos fíes”. En definitiva, “un día pa pasalo bien n’asturianu”.

Pa neños y neñes de 2 a 10 años

L’actividá va principiar el domingu a les11 hores con un taller de xuegos tradicionales asturianos entamaos pola Asociación Cultural Esbilla, pa depués dar pasu al meudía al dúu Mestura y les sos ‘Palabres de carambelu”. Neños y pas van poder disfrutar darréu d’un taller del cocineru Lluis Nel Estrada, previstu pa les 13 hores, de nome ‘Descubriendo los nuesos quesos’, pa lo que ye necesario inscribise previamente’l mesmu domingu pela mañana na tienda del aire de Reciella.

Tres una posa pa xintar, que se va poder facer na barra con productos asturianos que va instalase nel tendayu del Muséu del Pueblu d’Asturies, a les 16 hores va celebrase una gymkhana per tola instalación baxo’l nome de ‘Lletres nel muséu’. Llueu va ser turnu del baille tradicional cola Escuela de Música Tradicional La Quintana y el taller ‘Xugando cola música’, que precisamente depués va ufrir una actuación. Pa finar la xornada, a les 19 hores va haber una danza prima.

Amás d’esta programación, van entamase delles actividaes paraleles, como un pintacares –que va tener el costu d’un euru–, televisión n’asturianu con ‘Presta asgaya’ de TPA o la esposición ‘Agora Quini, agora’. Tamién van instalase puestinos de música y llibros de lliteratura infantil o xuvenil.

Toles actividaes son de baldre y tán destinaes principalmente pa neños y neñes con edaes comprendíes “ente los dos y los diez años”, apuntó Fidalgo, que destacó que n’ediciones anteriores llegaron a pasar alredor de 1.000 persones pel Muséu del Pueblu d’Asturies pa participar nel Día de la Reciella. Reciella recuerda que los pequeños han de tar acompañaos siempre por un adultu en too momentu.

Fonte: Asturies.com