18/10/15

Los porcentaxes na RTPA quedaron fuera del alcuerdu del plan de dignificación de la llingua

La FSA-PSOE argumentó l’autonomía del ente públicu de comunicación pa refugar la propuesta d’IX. La coalición pidía un 30 por cientu de programación n’asturianu en TPA y un informativu, y un 50 por cientu na RPA.
Los proposición non de llei d’Izquierda Xunida (IX) foi la base final del documentu qu’alcordaron FSA-PSOE, Podemos, Foro y la formación de Gaspar Llamazares, tres la presentación de delles enmiendes, y que s’aprobó ayeri na Xunta Xeneral colos votos en contra del PP y l’astención de Ciudadanos. Ésti insta al Conseyu de Gobiernu “a aprobar, enantes del final del periodu de sesiones próximu, un plan de dignificación y normalización de la llingua asturiana, que contenga un conxuntu d’aiciones urxentes col oxetivu d’algamar la so dignificación sociollingüística, la so proteición y el so puxu, con suficiente dotación presupuestaria pa cumplir tolos oxetivos, y nel que s’especifique la entidá responsable de la so execución, la previsión del costu de caúna de les aiciones, la so temporalización y los criterios pa la so evaluación”.
Del documentu orixinal l’ausencia única son los porcentaxes d’emisión na RTPA que pidía IX. “Emisión n’asturianu d’un 30 por cientu de la programación de la TPA en toles sos franxes horaries y en too tipu de conteníos, lo qu’incluyiría la emisión d’un informativu (el de la tarde o’l de la nueche) n’asturianu dafechu asina como la so utilización na programación infantil, programes deportivos, magazines, etc. El gallego-asturiano ha de tener el so espaciu proporcional nestos medios”, rezaba no que se refería a la televisión, mentes que pa la radio demandaba “la emisión n’asturianu d’un 50 por cientu de la programación de la RPA en toles sos franxes horaries y en too tipu de conteníos”. Pa la web del ente públicu de comunicación señala que ésta “ha d’aparecer por defeutu n’asturianu dafechu, ensin perxuiciu de que tamién pueda consultar la so versión en castellanu”.
Finalmente, el plan de dignificación de la llingua asturiana aprobáu ayeri queda reducíu a “puxar pola ampliación de la emisión d’espacios n’asturianu na programación de la RTPA, d’alcuerdu colos criterios de planificación y programación establecíos polos órganos rectores de la empresa pública RTPA”. Esta modificación nel documentu final vieno pol refugu de la FSA-PSOE, col argumentu de querer defender la autonomía de la direición del ente públicu de comunicación, que se va anovar próximamente.
Incorporaciones del restu de grupos
El restu de grupos parllamentarios incorporaron al documentu propuestes propies:  introducción del asturianu nel currículu d’Infantil; aprobar un reglamentu pa desarrollar la Llei d’Usu y Promoción del Bable/Asturianu y facer cumplir ésta a les alministraciones llocales; potenciar la capacidá de la direición xeneral encargada de la política llingüística; fomentar la industria cultural en llingua asturiana; fomentar la investigación científica; facilitar el conocimientu del idioma a los emplegaos públicos y a la población adulta en xeneral; y resaltar el valor de la llingua asturiana como marca identificativa d’Asturies y factor de la so promoción cultural y turística. Amás, incorporóse la demanda de Podemos de facer un tercer estudiu sociollingüísticu, que cuntaría cola collaboración de la Universidá d’Uviéu y que debería servir pa la ellaboración, xunto “coles organizaciones y axentes sociales más representatives del ámbitu llingüísticu”, del II Plan para la Normalización Social del Asturianu.
Fonte: Asturies.com

5 comentarios:

  1. El PSOE como de costume torgando l'espoxigue de la nuesa llingua ya IX pidiendo namái un 30% na TPA.

    ResponderEliminar
  2. El PSOE d'Asturies ye igual que tener l'enemigu dientro de casa, cosa perbien sabida dende fai muncho. muncho tiempu. Pero Izquierda Xunida yá nos sos ultimos extertores politicos ye peor porque otra vegada pedrica una cosa pol asturianu y depués esixe bien a la baxa y bien distinta esto ye que practica un xuegu bien penosu y macabru, la trampa saducea y mentirosa.

    ResponderEliminar
  3. Fai falta una canal de tv 100% n'asturianu.

    ResponderEliminar
  4. Si la RTPA emetés el 100% en asturià, amb les dades aproximades d'audiència a la mà, significaria que a Asturies hi hauria una oferta pública del 10% en asturià i del 90% en castellà. L'oferta privada continuaria sent del 100% en castellà.

    Rebaixar el percentatge exigit al 50% o al 30% és reduir l'oferta efectiva per sota del 10%.

    ResponderEliminar

Los comentarios tán pendientes de moderación. Espublizaránse lo primero dable.