15/10/15

La situación del asturianu tratóse en Bucarest na xunta xeneral d’ELEN

Iniciativa pol Asturianu treslladó a los sos socios los pilancos qu’atopó l’idioma nos meses últimos. Esti conceyu añal de la ONG tien como oxetivu aldericar sobre la situación de caúna de les llingües miembru y establecer la estratexa pal añu próximu.
“Nel nuesu casu, falamos de les caberes complicaciones del asturianu no tocante a los recortes nes ayudes a los medios, la reducción de Llingua Asturiana en Bachiller o la tercer negativa del Gobiernu estatal a incluyir a l'ALLA nos sos presupuestos, amás de resaltar l'ésitu de les nueses campañes de Twitter y de la iniciativa pa que los conceyales y alcaldes tomaren posesión n'asturianu, o l'entamu de rellaciones ente l'ALLA y l'Academia Mirandesa”, esplica Xose B. Álvarez, responsable de Rellaciones Internacionales d’Iniciativa pol asturianu, que se treslladó a la capital rumana dende Cymru, onde reside. La xunta celebróse’l sábadu y nella participaron 12 de les 44 organizaciones que formen la European Language Equality Network (ELEN).
En concreto, a Bucarest viaxaron representantes d’Asturies, Galicia, Euskal Herria, Països Catalans, Occitània, Breizh, Cymru, Éire, Alba, Kernow y Transilvania, amás de los representantes del Conseyu d'Aromunes, que fixeron d’anfitriones. Asina, nel Hotel Royal Bucharest hebo representantes de tolos estaos nos que'l pueblu arumanu esiste, esto ye, Albania, Serbia, Grecia, Rumanía, Bulgaria y Macedonia, que falaron de la so situación. Niciolas Caracota, presidente del Conseyu d’Aromunes, apuntó que s'enfrenten “a numberosos retos en dellos estaos de la XE, incluyendo la falta de reconocencia per parte de Rumanía y la falta xeneralizada de provisión d'escolarización media y de medios en fala aromuna”.
Temes aldericaos          Otros de los asuntos que se trataron na xunta xeneral d’ELEN foi’l proyeutu nuevu de Protocolu del idioma p'afitar un nuevu estándar llegal pa los drechos llingüísticos, que ta dirixíu pelos miembros vascos Kontseilua; l’informe recién d'ELEN nes Naciones Xuníes sobre discriminación llingüística nel Estáu español; les manifestaciones pola llexislación llingüística y la igualdá d’estatus pal bretón, l'occitanu, l'alsacianu, el corsu, el vascu y el catalán nel Estáu francés convocaes pal 24 d'ochobre; les actividaes de la ONG col Conseyu d'Europa, el Parllamentu Européu y la Comisión; el derechu a la educación media en gaélicu; la promoción del irlandés y el galés, asina como del húngaru en Rumanía y Eslovaquia; y el Proyeutu de Diversidá Llingüística Dixital d'ELEN nuevu, financiáu pola Xunión Europea (XE), “que tien l'oxetivu d'aumentar la cantidá de conteníu dixital online nes llingües minorizaes y en peligru de desaniciu”, apuntó Davyth Hicks, secretariu xeneral de la organización.                                                                                               Fonte: asturies.com

No hay comentarios:

Publicar un comentario

Los comentarios tán pendientes de moderación. Espublizaránse lo primero dable.