9/4/13

VIII Festival Internacional Máscara Ibérica en Lisboa: Los Sidros y Les Comedies

Los Sidros y Les Comedies nel VIII Festival Máscara Ibérica en Lisboa


   Los Sidros y Les Comedies van tar presentes otra vuelta nel Festival Máscara Ibérica de Lisboa

Del 9 al 12 de mayu va tener llugar la octava edición del Festival Internacional Máscara Ibérica de Lisboa. Los Sidros y Les Comedies de Valdesoto van representar a Asturies nun certame que tamién va contar cola participación de Skanda.

   Un añu más, Asturies va destacar nesti festival qu’axunta a 32 mazcaraes procedentes de Portugal, Galicia, Lleón, Zamora, Cáceres, Euskal Herria, Salamanca y Guadalajara, provincia que debuta nel certame. Amás, per primer vegada, va participar nel Desfile de la Máscara Ibérica, l’eventu más esperáu del festival, un grupu de fuera de la Península Ibérica, Survakari, de Pernik (Bulgaria). En total más de 500 personas caleyarán amazcaraos la tarde del sábadu 11 de mayu peles cais de la capital portuguesa nuna esplosión de color qu’atrae a miles d’espectadores.

   Progestur, coleutivu que tien como oxetivu la proteición del patrimoniu cultural portugués y qu’entama esti festival xunto cola Cámara Municipal de Lisboa y EGEAC, programa alredor d’esti desfile cuatro díes d’animación nel qu’hai güecu pa la música, la gastronomía y l’artesanía. Asina, ún de los puntos principales pa lisboetes y visitantes ye la Muestra das Regiões, instalada nel distritu de Rossio, na que participen entidaes, productores y artesanos de tolos territorios representaos. Tamién ta prevista la celebración de ‘Gastronomía Ibérica’, eventu que va acoyer exhibiciones por parte de cocineros de sonadía y nos que ta prevista la presencia de chefs asturianos, y de ‘Vinos Ibéricos’. La delegación asturiana espera que se desplace hasta Lisboa una representación institucional de los conceyos de Siero, Xixón y Cangues d'Onís pa conocer de primer mano'l certame y abrir víes de collaboración.

   Actuación de Skanda:  otra de les actividaes qu’atrae más xente al Festival Internacional Máscara Ibérica ye’l ‘Palco Ibérico’, ciclu de conciertos de baldre que se celebren en Rossio y que son una amuesa de la música que se fai en dellos puntos de la Península Ibérica. Nesta ocasión, la representación asturiana va correr a cargu de los mierenses Skanda, que van compartir escenariu’l vienres 10 de mayu colos gallegos Cuchufellos. Mentes, el sábadu ta prevista l’actuación de los portugueses Uxukalhus y los castellanos Iratxo, p’acabar el domingu con un conciertu de los portugueses Orquestra de Foles y Diabo a Sete.

  Fonte:  Asturies.com

5 comentarios:

  1. Asturies va estar bien representada en Rossio por Los Sidros y tamién por Les Comedies ente otres coses.

    ResponderEliminar
  2. Esta noticia nun tien nada que ver col tema del blogue, les llingües minorizaes ¿non?.

    ResponderEliminar
  3. Pero nun dexa de ser cultura astur (y l'asturianu)que llega a Portugal.

    ResponderEliminar
  4. Ye que la cultura y les costumes asturianes van estendiéndose y revitalizándo por toda la xeografía ibérica magar les torgues y les zancadielles cainites del torticeru gobiernu asturianu del Psoe y los sos mendicantes adláteres de poder que son IXunía.

    ResponderEliminar
  5. Los sidros y Les comedies representen personaxes de los pueblos asturianos, pa representar meyor la escena o la comedia y que la xente siéntase mas identificada la llingua que se utilia ye el asturianu, Esperemos
    que yos salga todo bien porque evidentemente esto ye cultura asturiana y una bona representacion.

    ResponderEliminar

Los comentarios tán pendientes de moderación. Espublizaránse lo primero dable.