Homenaxe a Pachín de Melás nel so 75 cabudañu

Les organizaciones Iniciativa pol Asturianu y Ástura entamen un actu d'alcordanza a la memoria d'Emilio Robles Muñiz, conocíu pol nomatu de Pachín de Melás.

Nel pasáu mes de marzu cumpliose'l 75 cabudañu de la muerte de Pachín de Melás, ún de los autores en llingua asturiana más populares del sieglu pasáu. Dende Iniciativa pol Asturianu consideren "más necesario que nunca reconocer la so figura, yá que les entidaes públiques nun faen un res pola so memoria nestos díes". Nesi sentíu, dende Iniciativa y Ástura confirmen que tará presente la última fía viva del autor, amás de dellos familiares d'esta importante figura asturianista.

Dende dambes entidaes organizadores manifiesten que Pachín de Melás "ye un personaxe que nun puede ser escaecíu pola so importante aportación a a la lliteratura y a la llingua y cultura asturianes", y ye por ello que treslladen el convide "a tolos ciudadanos que quieran participar a facelo asistiendo al actu y lleendo un poema o otru testu de Pachín que-yos preste".

Pa finar, adelanten tamién que ta confirmada yá l'asistencia de dalgunos escritores y otres persones de la sociedá asturiana, que van facer homenaxe al escritor xixonés. L'actu celebraráse'l vienres 5 d'abril, a les 20 hores nel Atenéu Obreru de Xixón, allugáu na cai Cuadonga, 7 1u Izquierda.

Fonte: Infoasturies