La XXXIV Selmana de les Lletres Asturianes, dedicada a Nené Losada Rico

 Pablo R. Guardado

Un actu en Grau va abrir esti llunes la XXXIV Selmana de les Lletres Asturianes, que van tar dedicaes a la figura de Nené Losada Rico. El vienres va celebrase n’Uviéu’l Día de les Lletres Asturianes, col actu académicu y la manifestación.

La obra y la figura de l’autora de Valdés, una de les poetes más reconocíes de la nuesa lliteratura, va ponese en valor con una serie d’actividaes a lo llargo de tola selmana. Nené Losada Rico (Ḷḷuarca, 1921-2009) comenzó a escribir poemes y rellatos tanto en castellanu como n'asturianu occidental, siguiendo pronto la estela del Padre Galo al enfocar les sos creaciones a un tonu popular. Llueu, éstes evolucionaron, tanto na temática como na forma, a espresiones llíriques nueves y a un intimismu mayor. Ente les sos espublizaciones destaquen ‘Cantares valdesanos’ (Llibros del Pexe, 1992), ‘Entre apigarzos’ (Trabe, 1997) y ‘El nome de las cousas’ (Trabe, 2001), amás de les antoloxíes ‘Fueyas que reverdecen’ (Atenéu Obreru de Xixón, colleición ‘Tiempu de cristal’, 2005), ‘Obra poética en castellano’ (coedición de la Fundación Fernández Lema y Trabe qu’incluyía tamién un CD) y el volume ‘Obra completa n’asturianu’ (Trabe, 2011).

Antón García, Taresa Lorences y Esther García, acompañaos na música por Rafa Lorenzo, van participar na moscona Capiella de los Dolores, a partir de les 19.30 hores, na actividá ‘El nome de las cousas. La voz de Nené Losada’, eventu qu’abre la Selmana de les Lletres y nel que collabora la Fundación Aula de les Metáfores. Mentes, mañana al meudía va recuperase, tres un añu de parón por mor de les eleiciones anticipaes del 2012, l’actu institucional na Xunta Xeneral, onde los políticos asturianos lleen poemes nel idioma del país. Una hora enantes, escolinos y escolines van facer una visita guiada en llingua asturiana pel edificiu.

Pela tarde del martes, va tener llugar nel Centru Niemeyer una de les novedaes de la edición trixésimocuarta de la Selmana de les Lletres: la celebración del actu poéticu-musical ‘Biltar’. Nél van tomar parte los artistes Alfredo González, Anabel Santiago, Héctor Braga, Mapi Quintana, Pandereteres de Fitoria y la banda Xera xunto colos poetes Aurora García Rivas, Pablo Antón Marín Estrada, Pablo Texón, Sofía Castañón y Xosé Ánxelu Gutiérrez Morán. L’actu va principiar a les 20.30 hores y va retresmitíse pela TPA, anque non en direuto.

Feria del Discu y del Llibru n’Asturianu

El miércoles, al ser el Día del Trabayador y Trabayadora, nun va haber actividá. Ésta va retomase’l xueves, a les 13 hores, cola inauguración de la Feria del Discu y del Llibru n’Asturianu, figura que se retoma y que va asitiase na Pescadería Municipal Antigua d’Avilés. A esa mesma hora, va tener llugar la presentación de la edición conmemorativa ‘El ríu y la memoria’, una antoloxía poética de Nené Losada Rico de la que ye responsable Taresa Lorences. La feria va permanece abierta al públicu hasta’l domingu n’horariu de 11 a 14 hores y de 17 a 21 hores hasta’l sábadu, mentes que na xornada cabera va tener les puertes abiertes de 11 a 19 hores.

A les 19.30 hores, nel salón d’actos del Campus d’Humanidaes de la Universidá d’Uviéu, van presentase les espublizaciones de les obres ganadores de los Premios Lliterarios 2012. Los autores que se llevaron estos gallardones foron Quique Faes, por ‘La vida increíble’ (XXXIII Premiu Xosefa Xovellanos de novela); José Ángel Gayol, por ‘El llibru de les coses misteriores’ (XVIII Premiu Xuan María Acebal de poesía): Xulio Arbesú, por ‘Los deseos del dineru’ (XVIII Premiu Máximo Fuertes Acevedo d'ensayu); Milio Rodríguez Cueto, por ‘Carne de melandru’ (V Premiu María Xosefa Canellada de lliteratura infantil y xuvenil); y Javier Marinas, por Homes (IV Premiu Alfonso Iglesias de cómic).

XXXIV Día de les Lletres Asturianes

La xornada central de la Selmana torna a ser el vienres, cola celebración del XXXIV Día de les Lletres Asturianes. L’actividá va principiar al meudía cola tradicional actividá escolar, que nesta ocasión va celebrase nel Colexu Públicu San Miguel de Trevías, población onde Nené Losada Rico paso la so infancia. Tres una intervención de les autoridaes, van entregase los gallardones del XVIII Certame Artísticu Lliterariu, del X Certame de Cartelismu y del II Certame de Creación Audiovisual.

Pela tarde, la Xunta pola Defensa de la Llingua Asturiana celebra, como ye vezu, una manifestación coincidiendo con esta xornada pa reclamar una demanda yá vieya: la oficialidá de la llingua asturiana. La marcha va partir a les 19.30 hores de la Estación del Norte (RENFE) y va terminar un poco enantes de les 20.30 hores nel Teatru Campoamor, recintu qu’esti añu torna a acoyer la Xunta Estraordinaria de l’Academia de la Llingua Asturiana. Esti actu, que va tar presentáu por Próspero Morán y Sonia Avellaneda y va contar coles actuaciones del gaiteru Álvaro Cueto y Toli Morilla, va servir d’acoyida a un académicu nuevu, David Melendi Palacio, doctor n’Inxeniería Informática y profesor del área d’Inxeniería Telemática de la Universidá d’Uviéu, “onde vien desendolcando’l so llabor investigador, siendo ún de los principales promotores na anovación de la llingua asturiana nes nueves teunoloxíes”. Amás, va poder sentise’l siempre esperáu discursu institucional de la presidenta Ana María Cano.

Coincidiendo col Día de les Lletres Asturianes, tamién tien llugar el Día del Llibru n’Asturianu, nel que llibreríes y comercios de tol país ufren un 10 por cientu de descuentu na compra de llibros y discos n’asturianu, amás d’un exemplar de ‘El ríu y la memoria’ de baldre. Nesta ocasión, el llistáu d’establecimientos participantes ye’l siguiente: Aldebarán, Antares, Casa del Libro, Cervantes, El Corte Inglés, Diocesana, Garluc, Maribel, Ojanguren, Polledo, Puntos, Reconquista, San Pablo, Santa Teresa, II Milenio y Servitec (Uviéu); Bardos, Central, Cornión, El Corte Inglés, English Books Shop, Hernández, Paradiso, Roy y Tienda Mundo Sonoro (Xixón); Azucel, Casona, Clarín, El Corte Inglés, Víctor Núñez, La Vieja Atalaya y Tienda Elepé Productions (Avilés); Disco 55, La Pilarica y La Torre (Mieres); Treito (Cangas del Narcea); Imagen (Cangues d’Onís); Mario (Cancienes); Sol (L’Entregu); Rima (L’Infiestu); Clarín (Llanes); A. Pantiga (Ciañu); Arvín (Llaviana); Helas (Ḷḷuarca); Gestión (Les Arriondes); Muséu de la Sidra (Nava); Naredo y San Vicente(La Pola Siero); y FNAC (Paredes).

Música y teatru

La banda de folk-metal Taranus, ganadora del VII Premiu al Meyor Cantar por 'Ensin ti', va ufrir un conciertu’l sábadu nel Auditoriu Teodoro Cuesta de Mieres na actividá final de la Selmana. Sicasí, el miércoles 8, dientro de los actos programaos pola Conseyería d’Educación, Cultura y Deporte, va tener llugar la gala d’entrega de premios del I Certame de Teatru Escolar en Llingua Asturiana/Gallego-asturiano, cola representación de les obres premiaes y la participación del Grupu d’Animación Musical Escolar (GAME). Va ser nel xixonés Teatru de la Llaboral a partir de les 18.30 hores.

Fonte: Asturies.com