TPA: Milio'l del Nido presentador de La Bolera

Milio’l del Nido: "La Bolera ye un intentu de dar sitiu na tele a deportes y xuegos que tán medio escaecíos y arrequexaos"

El presentador de la TPA cuéntanos el so proyectu últimu, dedicáu a los xuegos y deportes tradicionales d'Asturies.  Inaciu Galán

Milio'l del Nido, nun momentu del programa

   Un cocineru metíu a cuentacuentos que ye yá tou un personaxe de la televisión asturiana dempués de munchos años nesti mediu. En febreru pasáu terminó con un proyectu que tuvo cinco años en marcha “Al aldu: recetes con cuentu”, onde a cada platu amestába-y una hestoria y una charra con dalgún convidáu. Agora, un añu más tarde, torna a la TPA con un proyectu nuevu, “La bolera”, onde los xuegos y deportes asturianos son los protagonistes. Falamos con él d’esti nuevu programa y d’otres cuestiones.

   -Vuelve a la televisión con un proyectu centráu nos xuegos y deportes tradicionales, ¿echa de menos la cocina y les sos “recetes con cuentu”?
-Pienso que son dos coses xebráes, les recetes con cuentu yeren un repasu de platos que pa mi guardaben dalgún recuerdu placenteru, dalguna hestoria curiosa o simplemente la disculpa pa contar dalgo que me refervía nel maxín. Lo de “La Bolera” ye un intentu de dar sitiu na tele a deportes y xuegos que tán medio escaecíos y arrequexaos ensin poder mostrase a la xente y que son una ximuestra del calter asturianu, una ximuestra del mou de divertise de la nuesa xente.

   -Cuéntemos un pocoñín qué podemos ver en “La bolera”.
-Na Bolera van tener sitiu dende la Cuatreada que ye la bandera de los deportes tradicionales hasta el Liriu o el Baltu, o’l Gomeru, que ya poca xente conoz y nun se sabe cuasi de la so esistencia.

   -Nesti nuevu espaciu ta en contactu con una montonera d’actividaes deportives y d’espardimientu, ¿ye complicao nun perdese con tanta variedá?
-Nunca la bayura de coses bones foi mala pa naide, y anque yo nun seya nengún especialista, tenemos a Carlos Suari de guionista del asuntu y a toles persones que se mueven nos milenta mundos d’esos deportes y xuegos lo que facilita enforma el movese por esos andurriales.

   -¿Qué tal acoyida ta teniendo’l programa?
-De momentu tamos encantaos, con unos índices d'audiencia que superen en muncho les espectatives. Claro que col equipu que formen Antón, Carlos y Llucía a min nun m'estraña un res, porque consiguieron facer un programa axil y dinámicu, un programa que s’esfruta viéndolu.

   -¿Y ente la xente que practica estos deportes tradicionales?
-L'acoyida nun puede ser meyor, los prazticantes d'estos deportes tan minoritarios nun tan acostumaos a ver les cámares movese nos llugares onde disputen los sos alcuentros y como tán arguyosos de conservar estos xuegos y deportes, que formen parte de la nuesa cultura, apoyen con entusiasmu toles iniciatives que se acerquen a lo que ye la so afición y trátennos como si fuéremos nós les figures y non ellos.

   -¿Facía falta llevar a la televisión a la nuesa cultura del xuegu?
-Nestos tiempos paez que lo que nun sal na tele nun esiste y esti programa puede ser el altavoz que se precisaba pa llamar l’atención sobre dalgunu d’ellos pa que nun muerra.

   -¿Qué xuegos son los que-y presten más?
-La verdá que ye dificil pa min escoyer, de neñu xugué a munchos d’ellos y vi otros anque yo nun participare y velos agora, dempués de tantos años, tovía alitando, hasta m'emociona. Nun sabría dicite unu penriba los otros.

Otru momentu de "La Bolera"

   -¿Cuándo podemos ver La Bolera na TPA y cuántos capítulos tán previstos pa esta primer temporada?
-La primer entrega salió’l 16 de marzu y de mano contamos con facer ventipicu programes, qu’espero acaben siendo munchos más.

   -¿Pue avanzanos dalgún conteníu, dalgún convidáu?
-El nuesu enfotu ye que pasen pol programa tolos deportes y la mayoría de los sos practicantes, nun me paez guapo nomar a dalgunu penriba d'otros ¡Querémolos a toos na Bolera! (rises)

   -¿En qué proyectos trabaya Milio’l del Nido como escritor?
-Les coses tán mui paraes nel mundu de les editoriales ¡Nun hai perres! Pero tengo perhí un llibru de cosadielles qu’espero ver salir pronto y otru cuentu infantil, pero yá veremos.

   Fonte:  Asturnews.