El recorte final del presupuestu de l’Academia de la Llingua Asturiana (ALLA) va ser del 40 por cientu. Esta mengua nueva, conocida’l llunes por Ana María Cano, lleva a la presidenta a reclamar la intervención de Francisco Álvarez-Cascos.
Según informó Cano, l’ALLA pasa de recibir 230.000 euros nel 2011 a 134.320 euros nel 2012 y non los 167.900 euros que nun primer momentu s’esperaben. Esta mengua nueva na cantidá confirmóla’l direutor de Política Llingüística, Alfredo Ignacio Álvarez Menéndez, ayeri a la presidenta de la institución académica. “Dixóme que se recortaba de tolos sitios y qu’a nosotros nos tocaba un 40 por cientu", a pesar de que’l contestu presupuestariu nel país ye una prórroga de les cuentes del 2011. Por esti motivu, Cano reclama la intervención d’Álvarez-Cascos y pide al restu de grupos políticos que s’impliquen y se pronuncien ante lo que considera una "situación mui inxusta"
Con esti recorte, a l’ALLA quedaríen-y 134.320 euros, de los que pa los cuatro trabayadores y la llimpiadora diríen 118.000 euros. Mentes, los aproximadamente 16.000 euros restantes se destinaríen pa la organización del Día de las Lletres. "Los puestos de trabayu son sagraos. Nun queremos que tean en peligru, pero si esto sigue asina, nun sé", manifestó. Darréu, Cano señaló que na ALLA son conscientes de la situación económica, pero recordó que’l presupuesto del 2011 yá taba "axustáu en estremu" y daben pa los gastos de personal, la investigación, 24 espublizaciones de coleiciones llingüístico-filolóxiques, la organización del Día de les Lletres, las Xornaes Internacionales d'Estudiu y los gastos académicos y de personal de la Universidá Asturiana de Branu.
Por último, recordó que nin los cargos direutivos de l’ALLA nin los académicos cobren, tal y como s’establez nos estatutos d’esta institución pública. El recorte pon, na so opinión, en "peligru grave" el procesu de normalización y de recuperación llingüística que se ta faciendo n’Asturies y supón l’escenario "más grave" al que l’ALLA tuvo qu’enfrentase hasta la fecha. Cano nun entiende cómo un partido como Foro Asturias Ciudadano (FAC), que presume de potenciar lo propio, puede llegar a tomar esta decisión.
Fonte: Asturies.com
Onde nun hai panchón toos entaman el discutiniu, y lóxicamente tamién l'ALLA.
ResponderEliminar¿Y Cascos? ...a lo suyu.
L'amigu Cascos nun ta pa estes fasteres, ta güeyando pa les elleiciones prósimes.
ResponderEliminarMenos pidir la intervención d'Álvarez-Cascos y muncho más salir a la cai con desixencies destemplaes, que yá ta bien de misticismos filofófico-lliterarios nes altures psicodéliques.
ResponderEliminarNos presupuestos que presentaron tocába-y a l'Academia un recorte del 27%. Cuando los refugaron milenta asturianistes blincaron de contentu allegrándose del sapiazu casquista. Agora colos prorrogaos el recorte medra al 40%. Ye lo que tien l'infantilismu suicida del asturianismu.
ResponderEliminarConseyu pa l'ALLA: necesítense munches más ximuestres na calle Uría, banderes y munchu ruidu pa los políticos. Coles conferencies y coles bones pallabres nun hai perres dafechu.
ResponderEliminarTamos toos na llucha pola defensa de la llingua y la cultura asturianes ¡ánimu!
ResponderEliminarL'ALLA nun ta pa eses coses, ta y esiste pa trabayar pola llingua y pola so nobleza académica.
ResponderEliminar....pero ensin perres nun pue faelo
ResponderEliminarY si nun hai perres pa esti capítulu ¿podríen asacase de otres partides presupuestaries?
ResponderEliminarSegun el Principado,el retayu presupuestariu ye p'afitar prioridaes. La llingua asturiana nun ye una prioridá pa la Conseyería Cultura nin pal gobiernu de Cascos. Cosa per otru llau que yá sabiemos.
ResponderEliminarTamos llistos, confesaos, llicenciaos, copaos, y ...capaos. Esto ye la monda.
ResponderEliminarPaez qu'Ana Caso nun ta bien asesorá del too, hai que pidir y desixir a cara perru.
ResponderEliminarMuncha intelectualidá nel parnasu les lletres, que ta perbién, pero hai poca fuercia na cai cola xente de a pies y asina con esti divorciu a l'asturiana establecíu, la llingua y la oficialidá nun furrulen.
ResponderEliminar