Asturiana Mining Company gana’l Premiu al Meyor Cantar del 2011

Asturiana Mining Company llevóse’l Premiu al Meyor Cantar col tema ‘Si nun conoces Vaḷḷouta’. D’esta forma, la banda lliderada por Michael Lee Wolfe va representar a Asturies nel Liet International 2012, que va celebrase en Xixón.

Cientos de persones acudieron al Teatru de La Laboral pa presenciar la gala del Premiu al Meyor Cantar, na que los cinco artistes seleicionaos interpretaron el tema col qu’aspiraben a llevase’l gallardón d’esti añu. Les canciones yeren ‘Si nun conoces Vaḷḷouta’, de l’Asturiana Mining Company; ‘L’altanera’, de Macadamia; ‘Campos de meiz’, de Bacotexo; ‘Yo quixera’, de Xera; y ‘Felina Bipolar’, d’Alfredo González. Tres les actuaciones, y mentes el xuráu presidíu por Alfredo Ignacio Álvarez Menéndez, direutor xeneral de Política Llingüística, y formáu por Lisardo Lombardía Yenes, direutor del Festival Intercélticu de Lorient; Ana Vanesa Gutiérrez González, escritora y presentadora de ‘Pieces’; Aurelio Argel, críticu musical; Alberto Toyos, periodista y direutor de 40 Principales Asturies; Onno Falkena, representante de Liet International; y Rebeca Velasco, cantante y profesora de Música, deliberaba qué formación merecía’l premiu, Skama La Rede, ganador de la edición pasada, ufrió un conciertu de cinco canciones. Nél, el so vocalista y llocutor de la RPA, Miguel Fernandi, aprovechó pa mostrar una camiseta d’apoyu al ente públicu de comunicación.

El conseyeru de Cultura y Deporte, Emilio Marcos Vallaure, foi la persona encargada d’entregar el gallardón, una escultura de l’artista María Xesús Rodríguez que lleva’l nome de ‘El Pasco’, a Michael Lee Wolfe, músicu estauxunidense afincáu n’Asturies y fundador d’Asturiana Mining Company. Hores enantes, Marcos Vallaure recibiera a los representantes y delegaos qu’acudieron a la reunión añal de socios del Liet International celebráu na mañana del sábadu. El llunes, a les 10 hores, la sala de xuntes del edificiu alministrativu de la Llaboral va acoyer la primer xunta de trabayu pa organizar la edición d’esti añu del festival de la canción de llingües minorizaes. Ésti va celebrase en seronda en Xixón.

Fonte: Asturies.com