Equo defende la escolarización n’asturianu y afirma que la sociedá sofita la oficialidá del idioma

Marzu 7, 2013 por Pablo R. Guardado
El partíu ecoloxista Equo defende’l derechu a escolarizar n’asturianu y considera que la sociedá asturiana sofita la oficialidá del idioma. Esti xueves, los maestros van concentrase pa protestar contra la precarización de la materia pola LOMCE.

Nun comunicáu asoleyáu esta mañana, Equo amuesa’l so convencimientu de que “la sociedá asturiana ye abondo madura y sofita la oficialidá del asturianu, y del gallego-asturiano nel so ámbitu llingüísticu”, polo qu'encamienta “a les fuercies presentes nel Parllamentu asturianu a entamar los trámites necesarios p'aprobala”. Los ecoloxistes faen esta declaración coincidiendo cola concentración convocada esta tarde, a partir de les 18.30 hores na uviedina Escandalera, pola Asamblea de Docentes de Llingua Asturiana pa esixir "que la reforma educativa nun precarice tovía más el nuestru idioma".

Equo defende’l “derechu de los padres y madres d'educar a los sos fíos y fíes n'asturianu” en toles estayes del sistema educativu al entender que “tener una llingua propia ye bono pal nuesu país y amás sirve a la xente mozo a abrise a otres llingües y cultures”. “La finalidá de la educación nun ye crear trabayadores sumisos, sinón faer ciudadanos comprometíos, por eso creemos que la calidá de la educación nun ye namás l'informe PISA, tamién lo ye conocer d'ónde venimos y cómo foron, vivieron y falaron los nuesos güelos. Namás asina vamos poder entender meyor el mundu nel que vivimos”, añaden.

Sobre la Llei Orgánica pa la Meyora de la Calidá Educativa (LOMCE), conocida de manera popular como Llei Wert, el partíu ecoloxista, en pallabres del so covoceru n’Asturies, Adrián Blanco, afirma que se trata de “una reforma marcada pol componente ideolóxicu –non por cuestiones téuniques– que nun busca'l consensu. El ministru Wert ta más ocupáu n'atender a los sos intereses políticos qu'a sirvir a la ciudadanía”.

Compromisu por Asturies tamién sofita la concentración

Amás de los coleutivos cívicos que trabayen pola dignidá pal idioma, Xunta pola Defensa de la Llingua Asturiana y Iniciativa pol Asturianu, Compromisu por Asturies tamién sofita la concentración d’esta tarde y llama a la ciudadanía a participar nella. “Como yá nos posicionáremos selmanes atrás, dende la federación consideramos que’l vacíu llegal qu’ufierta l’anteproyeutu de la Llei Orgániza de Meyora de la Calidá Educativa (LOMCE) tocante a l’asignatura de Llingua Asturiana nos diferentes niveles educativos, presenta un caldu de cultivu perfectu pa la degradación de la materia y los docentes de la mesma. D’esta miente, creemos necesaria una repuesta contundente y nidia de la Conseyería d’Educación que vaya na llinia de dignificar l’asturianu y el gallego-asturiano nel sistema educativu”. La organización nacionalista considera que l’aición del Gobiernu “nun pue pasar per otro que la creación de la especialidá y la dotación de l’asignatura d’un marcu llegal afayadizu que garantice la so presencia en condiciones iguales al del restu de les materies”. Por último, Compromisu demanda la oficialidá como solución única pa garantizar los derechos llingüísticos de los asturianos.

Fonte: Asturies.com