Compromisu culpa al PSOE y al PP de la situación "d'indefensión, inseguridá xurídica y precariedá" de la materia Llingua Asturiana

      El "rexime bipartidista" del PSOE y el PP nel país ye pa Compromisu por Asturies la razón de la situación "d'indefensión, inseguridá xurídica y precariedá" del idioma tanto nel enseñu como n'otres estayes. "Al impedir repetidamente la oficialidá del asturianu, con una insistencia que torgó que l'asturianu tea de pies d'igualdá con otres llingües del Estáu, y cola consiguiente discriminación de los sos falantes, llegóse a una situación de gran vulnerabilidá, que nel casu de la enseñanza traduzse na falta d'una especialidá propia y l'ausencia total o parcial de la Educación Infantil y Bachilleratu", llamenten dende la federación de partíos y independientes. Sobre manera, alerten sobre "la picaresca que se vien dando pa incumplir la llei, especialmente en dellos centros concertaos".

    Compromisu llama a la ciudadanía a buscar un relevu de los partíos nel poder que sirva pa consiguir "un marcu políticu d'igualdá llingüística qu'asegure los derechos de los falantes d'asturianu y gallego-asturiano".    Fonte: Asturies.com

Compromisu por Asturies pide salir a la cai pa defender la llingua asturiana

Daniel Fernández afirma qu'ensin el sofitu social esistente al asturianu, el PSOE yá lu habría esaniciáu de l'axenda política. Compromisu por Asturies llama a la ciudadanía a defender la cultura y llingua asturiana participando na manifestación convocada pola Xunta pola Defensa de la Llingua Asturiana que va tener llugar esta tarde n'Uviéu y con salida na Estación del Norte a les 19:30 hores. Destaquen “la importancia de que la xente sala a la cai a reivindicar la so llingua y la so cultura, especialmente ante un gobiernu d'un Javier Fernández, que na so obsesión de ganar puntos ante Madrid, siempres prefier allabar lo que vien de fora ante lo propio, nuna amuesa de cosmopaletismu tan característicu de tola etapa socialista”. Pa Compromisu por Asturies “la única forma de conocer el mundu ye saber quién ye unu, d'ónde vien y onde vive y solo la ignorancia de lo propio fainos asumir modelos culturales y llingüísticos ayenos a la nuesa tradición, lo que s'afigura nun complexu d'inferioridá que lleva a los nuesos políticos a dicir que defender los intereses d’Asturies ye populismu, y acatar lo que digan dende Madrid ensin gorgutar por llealtá institucional, tal que afirmó Javier Fernández nel últimu Alderique d'Orientación Política, ya qu'una Asturies onde cueye tol mundiu tien que ser una Asturies con identidá propia”. Apuesten por “participar nel bloque soberanista asturianu, p'amosar de la forma más xunitaria posible l'apueste por defender la oficialidá del asturianu como'l preséu necesariu, anque non abondu, pa garantizar la supervivencia d'una llingua en grave peligru de desapaición como diz la mesma UNESCO o XE”. Daniel Fernández afirmó que “ensin el sofitu social esistente al asturianu, el PSOE yá lu habría esaniciáu de l'axenda política, polo que se fai vital siguir sofitando les convocatories de la Xunta pola Defensa de la Llingua Asturiana”. Fonte: Queyeho.com

Multa en Mieres por una autorización escrita n'asturianu

La oficialidá preséntase como la única alternativa pa acabar con abusos como la multa en Mieres por escribir n'asturianu

L'abusu manifiestu d'un policía de Mieres que multó a un trabayador de la Casa la Cultura de Mieres por "nun entender" la frase n'asturianu "Autorización Aparcamientu" traxo ayeri a l'actualidá otra vuelta la necesida d'un marcu llegal d'oficialidá qu'acabe con abusos d'esti tipu de marxinación inaceptable qu'entá sufren los falantes d'asturianu nel so país. Partíos y asociaciones entamaron esti vienres a manifestar la so indignación dafechu y a reclamar darréu la "oficialidá" de la llingua asturiana. La multa provocó la quexa de la Casa Cultura de Mieres que vien d'unviar un escritu Aníbal Vázquez, alcalde del conceyu, por mor d'esti casu de represión llingüística sufrida por un conductor, a causa d'un supuestu "aparcamientu indebíu". La realidá de los fechos foi que'l vehículu, aparcáu nuna zona acutada énte la Casa Cultura, tenía nel salpicaderu una autorización escrita n'asturianu y que l'axente dixo "nun entender", polo que decidió poner una multa d'ochenta euros, repitiendo esa mesma multa a otru conductor depués. Ismael González Arias, responsable de la Casa Cultura Teodoro Cuesta de Mieres, treslladó a la Casa Conceyu'l so maltar pola situación con un escritu irónicu nel que s'ufierta "a dar clases de bable a los policíes", asina como en castellán, pola esistencia de faltes d'ortografía na multa. Asociaciones y Partíos políticos refuguen el casu A lo llargo de la mañana vienen asoleyándose abondes notes de prensa criticando la midía por parte d'asociaciones y partíos políticos, dende Andecha y Compromisu a N'Ast, esperando que sigan apaeciendo a lo llargo del día manifestaciones nel mesmu sen. Pa l’Asociación Cultural N’AST, casos como l’asocedíu va un par de díes en Mieres ponen bien a les clares la situación d’anormalidá democrática que tamos viviendo n’Asturies derivada de la falta d’oficialidá de la llingua asturiana. Por desgracia, situaciones tan esperpéntiques como l’asocedía nel conceyu mineru son, según l'asociación, "bastante más habituales de lo que pueda paecer, por eso dende N’AST perafitámonos na nuesa reivindicación d’oficialidá pal asturianu, una oficialidá que torgue estes situaciones y qu’ampare los drechos llingüísticos del pueblu asturianu". Fonte: Asturnews

Compromisu por Asturies amuesa l'esmolecimientu pol retayu nes plantiyes docentes

Compromisu por Asturies amuesa’l so esmolecimientu pol recorte nes plantiyes docentes

   La Conseyería d’Educación, Cultura y Deporte va facer efeutivos dellos recortes nes plantiyes docentes pal cursu 2013-2014. Compromisu por Asturies amuesa’l so esmolecimientu por esta situación qu’afeuta a alumnos y trabayadores.

   Según esplica la formación nacionalista, la nota remitida pola conseyería a los centros esti mesmu mes nel qu’apaez detallada la previsión de places de profesoráu en Secundaria “dexa bien a les clares la disminución de los recursos humanos”. Al respeuto, recuerden a la conseyera Ana González que tresformar les xornaes completes de los docentes a medies xornaes “supón un retayu encubiertu que ye vendíu a la opinión pública con unes cifres totales que nun son tales, en tantu que nun ye lo mesmo cuntar con ochenta docentes a xornada completa qu'a media xornada, anque teamos falando del mesmu númberu”.

   Estos recortes en plantiyes tamién afeutaríen a les escueles de 0 a 3 años, de titularidá municipal, según señalen dende Compromisu y dende’l Sindicatu Unitariu y Autónomu de Trabayadores de la Enseñanza d’Asturies (SUATEA). “La supresión d’educadores en toles escueles nun se basa na disminución de la demanda, sinón n’aforrar a costa de lo que sía: de la calidá del serviciu, de puestos de trabayu, etc. Porque con estos recortes, non sólo ta en peligru l’atención que reciben los usuarios de los mesmos, sinón tamién un bon númberu de puestos de trabayu que se van a suprimir; non modificar o treslladar, sinón a eliminar”, afirma’l sindicatu educativu, que recuerda que la función d'estos centros ye la de facilitar a les families nes que trabayen los dos miembros el dexar a los sos críos nun ambiente formativu.

   Fonte: Asturies.com

Compromisu por Asturies amuesa la so sospresa énte la decisión de la Xunta Xeneral del Principáu d´Asturies sobre los fondos documentales

La organización nun entiende la decisión adoptada por unanimidá na Xunta Xeneral del Principáu, d’esixir que los papeles asturianos que pasaron d’almacenase en Salamanca a almacenase en Catalunya vuelvan a Salamanca

Dende Compromisu recuérdase que lo que procedería, si les instituciones asturianes consiguieran abandonar la so mentalidá provinciana y se comportaran como representantes de los intereses y del patrimoniu del país que los escoyó, ye l’unvíu a Asturies de los documentos, xuntu col restu de los documentos asturianos qu’entá s’atopen en Salamanca, pa, na llínia que se siguió en Catalunya, que pasen a formar parte del patrimoniu asturianu y puean ser custodiaos nun llugar dignu.

Compromisu por Asturies recuerda que’l llugar onde tean los papeles tien un valir principalmente simbólicu porque anguaño tolos documentos pueden ser copiaos y ufiertaos a consulta en cualesquier llugar fisicu ya inclusive na rede.

Fonte: Aruelu.com

L’Atenéu N’Alfoz y Compromisu critiquen la decisión del Niemeyer pa col Conciertu pola Oficialidá

Pablo R. Guardado
La negativa del Centru Niemeyer a acoyer el Conciertu pola Oficialidá d’esti añu provocó les crítiques de l’Atenéu n’Alfoz y de Compromisu por Asturies. Dambos coleutivos nun entienden esti actu discriminatoriu nuevu pa col nuesu idioma.

La entidá cívica qu’axunta a asturianistes d’Avilés, Castrillón, Corvera y Illas esixe a los responsables del Centru Niemeyer “respetu pola cultura asturiana”. “L’Atenéu N’Alfoz atopa nesta decisión una amuesa más de la actitú d’autoodiu promovida polos socesivos gobiernos d’Asturies, col oxetivu de dexar la nuesa llingua y cultura morrer nel escaezu”, señala nun comunicáu nel que reafita’l compromisu del coleutivu pola oficialidá y nel qu’amuesa la so solidaridá cola Xunta pola Defensa de la Llingua Asturiana (XDLA), organización qu’entama’l Conciertu pola Oficialidá xunto con Xunta Moza.

Pela so parte, la federación de partíos Compromisu por Asturies fala de “una discriminación nueva de la llingua asturiana”, más sangrante entá “al venir d’una entidá de financiamientu públicu”, con un costu de 40 millones d’euros, que se vende “como un espaciu pa la cultura” cuando, al mesmu tiempu, “refuga la presencia de la llingua asturiana nel so espaciu”. Pa Yolanda Huergo, vocera de la organización, negar el centru avilesín a la XDLA ye “la guinda del pastel, la culminación d’un proyeutu cultural qu’aveza a traenos dende la so nacencia noticies de sobrecoste, presupuestos inflaos y dineros perdíos de forma misteriosa; too ello paez que cola conocencia y permisividá del Gobiernu del PSOE, siempres más esmolecíu polo megalómanu que polo asturiano, y por conxurar les sos pantasmes y obsesiones en rellación cola cultura asturiana”.

Los nacionalistes ven nesta decisión “un exemplu nidiu de censura ideolóxica que s’axunta al nomáu paletismu la FSA, incapaces de valorar lo más cercano, inclinándose siempre por cualquier cosa que venga de fuera primero que polo fecho, falao o pensao n’Asturies”, lo que constitúi “otra amuesa del autoodiu qu’esiste ente los políticos asturianos”. Por último, reclamen la oficialidá de la llingua asturiana p’acabar “cola dicriminación de les y los asturianos pol fechu de selo y falar el so idioma”.

Fonte: Asturies.com

Equo defende la escolarización n’asturianu y afirma que la sociedá sofita la oficialidá del idioma

Marzu 7, 2013 por Pablo R. Guardado
El partíu ecoloxista Equo defende’l derechu a escolarizar n’asturianu y considera que la sociedá asturiana sofita la oficialidá del idioma. Esti xueves, los maestros van concentrase pa protestar contra la precarización de la materia pola LOMCE.

Nun comunicáu asoleyáu esta mañana, Equo amuesa’l so convencimientu de que “la sociedá asturiana ye abondo madura y sofita la oficialidá del asturianu, y del gallego-asturiano nel so ámbitu llingüísticu”, polo qu'encamienta “a les fuercies presentes nel Parllamentu asturianu a entamar los trámites necesarios p'aprobala”. Los ecoloxistes faen esta declaración coincidiendo cola concentración convocada esta tarde, a partir de les 18.30 hores na uviedina Escandalera, pola Asamblea de Docentes de Llingua Asturiana pa esixir "que la reforma educativa nun precarice tovía más el nuestru idioma".

Equo defende’l “derechu de los padres y madres d'educar a los sos fíos y fíes n'asturianu” en toles estayes del sistema educativu al entender que “tener una llingua propia ye bono pal nuesu país y amás sirve a la xente mozo a abrise a otres llingües y cultures”. “La finalidá de la educación nun ye crear trabayadores sumisos, sinón faer ciudadanos comprometíos, por eso creemos que la calidá de la educación nun ye namás l'informe PISA, tamién lo ye conocer d'ónde venimos y cómo foron, vivieron y falaron los nuesos güelos. Namás asina vamos poder entender meyor el mundu nel que vivimos”, añaden.

Sobre la Llei Orgánica pa la Meyora de la Calidá Educativa (LOMCE), conocida de manera popular como Llei Wert, el partíu ecoloxista, en pallabres del so covoceru n’Asturies, Adrián Blanco, afirma que se trata de “una reforma marcada pol componente ideolóxicu –non por cuestiones téuniques– que nun busca'l consensu. El ministru Wert ta más ocupáu n'atender a los sos intereses políticos qu'a sirvir a la ciudadanía”.

Compromisu por Asturies tamién sofita la concentración

Amás de los coleutivos cívicos que trabayen pola dignidá pal idioma, Xunta pola Defensa de la Llingua Asturiana y Iniciativa pol Asturianu, Compromisu por Asturies tamién sofita la concentración d’esta tarde y llama a la ciudadanía a participar nella. “Como yá nos posicionáremos selmanes atrás, dende la federación consideramos que’l vacíu llegal qu’ufierta l’anteproyeutu de la Llei Orgániza de Meyora de la Calidá Educativa (LOMCE) tocante a l’asignatura de Llingua Asturiana nos diferentes niveles educativos, presenta un caldu de cultivu perfectu pa la degradación de la materia y los docentes de la mesma. D’esta miente, creemos necesaria una repuesta contundente y nidia de la Conseyería d’Educación que vaya na llinia de dignificar l’asturianu y el gallego-asturiano nel sistema educativu”. La organización nacionalista considera que l’aición del Gobiernu “nun pue pasar per otro que la creación de la especialidá y la dotación de l’asignatura d’un marcu llegal afayadizu que garantice la so presencia en condiciones iguales al del restu de les materies”. Por último, Compromisu demanda la oficialidá como solución única pa garantizar los derechos llingüísticos de los asturianos.

Fonte: Asturies.com

Compromisu y la XDLLA desixen una rempuesta “contundente” na tema toponímica

Pablo R. Guardado

Compromisu por Asturies y la organización cívica Xunta pola Defensa de la Llingua Asturiana (XDLA) coinciden en reclamar al Gobiernu una respuesta “contundente” pol tema de la toponimia. Ven la oficialidá como solución única.

La federación de partíos calificó de “demencial qu'un ministeriu dea una respuesta que ye un auténticu insultu a la intelixencia, a la llexislación y al autogobiernu d'Asturies”, en referencia a la negativa de Madrid d’utilizar los tóponimos tradicionales del país, oficializaos pol Gobiernu, argumentando que “el único idioma oficial del Principado de Asturias es el idioma castellano”. Compromisu ve necesario “axustar los topónimos de les carreteres a les formes aprobaes pol gobiernu asturianu” y apunta que cola respuesta de Fomentu “lo único que queda nidio ye la fobia escluyente del gobiernu del PP a tolo que s'asemeye a la capacidá d'autogobiernu y al respetu a les decisiones de les instituciones asturianes”.

Los nacionalistes, que tamién faen referencia a la Llei Wert, creen que los populares pretenden “rematar el llabor de desaniciu de la llingua asturiana que yá entamaron gobiernos de tendencies distintes nes anteriores llexislatures, echando p'atrás mesmamente lo poco que se fixo nel procesu de normalización del idioma”. Por último, Compromisu reclama al Gobiernu d’Asturies “una respuesta contundente y digna de les instituciones asturianes” y recuerda “que'l marcu llegal que quitaría les escuses pa la marxinación de la llingua ye la oficialidá”,  polo que pide al conxuntu de la sociedá asturiana y a los partíos politicos presentes na Xunta Xeneral “que se reabra la reforma del estatutu d'autonomía pa recoyer, ente otres reformes necesaries, la declaración d'oficialidá”.

“Muestra la situación anómala del asturianu”

Pa la XDLA, la postura de Fomentu sirve pa mostrar “lo anómala que ye la situación llegal de la llingua asturiana, onde la falta d’oficialidá fai que l’aplicación de la Llei d’Usu dependa del interés de l’Alministración de turnu”, y califica la postura de Madrid como “un ataque a la llexislación propia y al autogobiernu del país”. “Ye chocante que’l mesmu Gobiernu central sía’l qu’afirme que nun va cumplir cola llei porque, al paecer, nun-y debe prestar que'l Gobiernu asturianu llegalice la toponimia tradicional”, añade nun comunicáu l’organización cívica.

Sobre l’anuncia de la Conseyería d’Educación, Cultura y Deporte de que solicitará al ministeriu’l respetu de la toponimia oficial d’Asturies, la XDLA afirma que, al igual qu’asocedió cola Llei Wert, “la petición ye siempre cola boca pequeña y nunca ye contundente y digna de les instituciones asturianes, que se supón que tendríen que defender lo qu’elles mesmes alcordaron, como la introducción del idioma nes escueles nel 1983 y la recuperación de la toponimia nel 1998 cola aprobación de la Llei d’Usu –anque’l procesu nun principiaría hasta’l 2002–”. Al respeuto, asegura qu’esa defensa del idioma “ye una obligación llegal y moral, porque ye'l Gobiernu d’Asturies l’encargáu de defender el nuestru patrimoniu llingüísticu”.

“Nun dexa de llamar l'atención que tanto nel debate sobre la Llei Wert como nel de l'aplicación de la toponimia asturiana podemos ver cómo dende Asturies la conseyera d’Educación y Cultura pide que se tenga en cuenta l’estatus especial de la llingua asturiana, una llingua reconocida nel Estatutu d'Autonomía pero non oficial. Paez ser qu’Ana González escaez qu’esa condición especial del idioma –tamién de los sos falantes– ye la consecuencia del desdexamientu de los distintos gobiernos d’Asturies, de los qu’ella ye heriede y cómpliz, y que nun quixeron regularizar la situación de la llingua, dalgo que provocó una situación insólita y única nel Estáu: una reclamación ciudadana non atendida que yá dura dende la Transición”, argumenta la XDLA. Por último, esti coleutivu quier treslladar al Partido Popular d’Asturies, que nel so programa políticu recoyía’l compromisu de siguir col procesu de revisión de la toponimia, “cuála ye la so opinión sobre tolo que ta pasando: si ta del llau de la llexislación y l’autogobiernu d’Asturies, del llau del programa col que se presentó a les elecciones autonómiques, o ta del llau de la postura de marxinar y facer de menos a la llingua y cultura asturiana, a los sos falantes y, en xeneral, a tola sociedá asturiana”.

Fonte: Asturies.com

“Ataque brutal” a la llingua asturiana cola sida de la crisis

Compromisu por Asturies fala d’un “ataque brutal” a la llingua asturiana cola sida de la crisis


Pablo R. Guardado
La mengua de 60.771,37 euros a les subvenciones al asturianu aprobada por Cultura lleva a Compromisu por Asturies a falar d’un “ataque brutal” a la llingua asturiana. La federación de partíos cree que detrás hai motivos “ideolóxicos”.

Yolanda Huergo, vocera de Compromisu, afirmó que “si la cultura ye una de les principales perxudicaes pola baxada de presupuestos, y la cultura asturiana va vese especialmente desprotexida pola falta d’inversiones y presupuestos específicos, la llingua va vese especialmente perxudicada polos prexuicios ideolóxicos de la xente que nos gobierna”. La baxada de diez millones de les antigües pesetes a les perres aprobaes pol Gobiernu anterior de Foro Asturias Ciudadano –que yá fixera una mengua importante con respeuto al añu anterior– pa les ayudes a la normalización del asturianu del 2012, provoca un descensu total del 61,53 por cientu en comparanza cola partida destinada nel 2011.

La llingua asturiana “al nun tener oficialidá nin esistir una política normalizadora afayadiza” ta nuna situación delicada, considera Huergo, qu’afirma que “la promoción y l’apoyu del PSOE” al idioma “nun vien d’una convicción propia, sinon de la movilización social y la voluntá de la mayoría de la sociedá asturiana, incluyendo votantes de los partíos mayoritarios, que nes décades pasaes apoyó un procesu de normalización que dende l’alministración trató de ralentizase”. Agora, la crisis ta valiendo pa que’l Gobiernu del país, “que nun tien nengún interés real cola normalización de la llingua asturiana, tenga una oportunidá pa desentendese cola sida de la situación económica; ello pue vese nesti recorte desproporcionáu y mui perriba de la media d'otres partíes”.

Compromisu por Asturies esixe “una rectificación” al Gobiernu sobre esti recorte y reclama-y “claridá na política llingüística”. Al mesmu tiempu, la federación de partíos ufrierta apoyu “a les aiciones o iniciatives que puedan llevar alantre organizaciones cíviques o defensores de los derechos llingüísticos pa tornar estos ataques”.

Fonte. Asturies.com