Organizaciones en defensa del catalán, vascu y gallegu piden a los grupos parllamentarios aída pa frenar la Llei Wert

   Les organizaciones Ciemen-Enllaçats per la Llengua, Kontseilua y A Mesa, de defensa del catalán, el vascu y el gallegu, respectivamente, consideren que l'anteproyectu de la Llei Orgánica pa la Meyora de la Calidá Educativa (Lomce) presentáu pol ministru d'Educación, José Ignacio Wert, supón un "ataque directu" a les comunidaes llingüístiques que representen, y por ello pidieron ayuda a los grupos parlamentarios pa tratar de frenar la implementación de la reforma.

   "Vinimos al Congresu pa denunciar el borrador presentáu por Wert, que lo que va facer ye arrequexar más a les nueses llingües y a los sos falantes. Nes últimes décades trabayamos pa normalizar les nueses llingües y creemos qu'esti borrador va ser un retrocesu", esplicó'l representante de Kontseilua, Paul Bilbao, antes de participar na primer xunta colos diputaos, p'añadir que'l so oxetivu ye llograr que los grupos tornen nel so "altavoz" nel Congresu.

   D'esta manera, pretenden consiguir que Wert "escuche la opinión de la sociedá civil entamada" que, al so xuiciu, ye "contraria dafechu" a la propuesta que fizo'l ministru. "El nuesu final oxetivu ye que tolos grupos o polo menos aquéllos que seyan favorables a la normalización de les llingües minorizaes tengan en cuenta la nuesa opinión, y qu'esa opinión se tresllade al órganu pertinente", detalló.

"LLEI DE LA 'WERTGÜENZA'"

   Asina lo manifestó tamién el representante d'A Mesa, Carlos Manuel Callón, que denominó l'anteproyectu como "Llei de la 'wertgüenza'" porque trata al gallegu, al catalán y al vascu como si fueren llingües "tóxiques" que tienen que caltenese, "como les melecines, alloñaos de los neños".

   Amás, el representante de l'asociación en defensa del gallegu alvirtió de que l'aplicación va crear una situación como "nunca la hubo en trenta años de democracia". "Tenemos que retrotrayemos al franquismu. Paez que Wert quier ser el Vesubiu pa les nueses llingües y que namás seyan elementos folclóricos pa colocar nos museos, pero nós queremos llingües vives", manifestó.

   Coles mesmes, denunció que cola nueva llei va agravase la situación que yá existe en Galicia, onde nestos momentos, según esplicó Callón, yá "ta prohibío que s'impartan determinaes asignatures en gallegu" y la Xunta ordenó "destruyir 190.000 llibros de testu pol fechu de que taben en gallegu". "Paez que Galicia foi'l bancu de pruebes p'aplicar la Lomce", manifestó.

   Pela so parte, el representante del Centre Internacional Escarré per a Les Minories Ètniques i Les Nacions (Ciemen), que forma parte de la plataforma 'Enllaçats per la Llengua', Joaquim Arenas, defendió'l modelu llingüísticu educativu catalán y la inmersión como métodu "aplicáu en munchos países, que Cataluña fizo suyu, pa poder realizar la escuela catalana pa tolos neños".

   "La llei de Wert ye una llei qu'ataya tol esfuerzu que se fizo mientres tol sieglu XX y qu'entama de bien lloñe", alertó, pa insistir en que la reforma amenaza la mentalidá pedagóxica que cuayó en Cataluña", y la so aplicación supondría "traicionar" a los neños catalanes porque se dexaría de dar a tolos alumnos los mesmos instrumentos.

   Coles mesmes, la representante de les entidaes de les Isles Baleares incluyíes na citada plataforma en defensa del catalán, Maria Antonia Font, defendió que Wert tien que retirar l'anteproyectu porque ye "recentralizador" y "poco democráticu". "Les llingües son los pegoyos de la ecuación y de los nuesos sistemes educativos", señaló.

   Nesta mesma llinia, la representante de les entidaes valencianes de 'Enllaçats per la Llengua', Amanda Gascó, manifestó que la llei "ye un ataque a la llingua dende'l mesmu sistema educativu", p'añadir que dichu ataque súmase al fechu de que na Comunidá valenciana "namás el 33% del alumnáu pue escoyer poder estudiar en programes d'enseñanza en valencianu". "La nuesa llingua ta minorizada, nun tien la condición de normalidá como tien el castellán", denunció.

Fonte: Europa Press