La Xunta pola Defensa de la Llingua Asturiana llama a la concentración pol enseñu del asturianu

   La  Xunta pola defensa de la Llingua Asturiana llamó esti martes a la participación na concentración convocada pol profesoráu d'asturianu, na plaza de la Escandalera d'Uviéu pa esti xueves 7 de marzu, a les 18.30 hores, en defensa d'esta asignatura, ante la entrada en vigor de la nueva llei d'educación, conocida como 'Llei Wert'.

   Al través d'una nota de prensa, la Xunta espresó qu'esta nueva normativa tien que valir "d'oportunidá p'ameyorar la situación de la llingua asturiana na enseñanza, aprovechando al máximo les posibilidaes d'esta llei nueva y de la Llei d'Usu y Promoción del asturianu". "La normativa curricular autonómica que s'apruebe tien que garantizar que la ufierta del asturianu seya universal en tolos centros y tolos niveles educativos que regula la LOMCE: infantil, primaria, secundaria obligatoria y enseñances secundaries postobligatories, en condiciones de llibertá d'elección, y non d'optatividá compitiendo con otres asignatures como hasta agora", señala la nota.

   Más pide que la llei "desanicie les práctiques discriminatories pa la llingua asturiana nos centros educativos de cualquier titularidá", y que prevea "la promoción real del asturianu nel sistema educativu, regulando tamién la posibilidá d'usalo como llingua vehicular p'aprender otres materies". "Pa eso ye fundamental qu'haya un serviciu de normalización llingüística na Conseyería d'Educación, Cultura y Deporte", añade la Xunta.

   La organización critica que "l'asignatura d'asturianu nun ye universal nos centros educativos d'Asturies". Amás, llamenta que  "tovía se dan práctiques illegales pa impedir la llibertá a la hora d'escoyela; l'alumnáu de secundaria obligatoria qu'escueye l'asignatura tien qu'optar ente estudiar asturianu o otra materia: ye optativa en cuenta de voluntaria; la so presencia nes enseñances postobligatories ye anecdótica; tampoco nun se pue usar como llingua vehicular pa la enseñanza d'otros conocimientos".

   Critica, igualmente que'l "profesoráu nun tien reconocida la especialidá pa la que se prepara, nun pue opositar pola especialidá d'asturianu nin algamar destín en places definitives". "Nun hai nel organigrama de la Conseyería d'Educación, Cultura y Deporte nengún departamentu que se dedique a la promoción de la enseñanza del asturianu, y nin siquiera'l conocimientu de la llingua se reconoz como requisitu o méritu pa trabayar en puestos docentes o alministrativos de la propia Conseyería", afirma'l comunicáu.

Fonte: Europa Press