El Conseyu d’Estudiantes entama una mesa redonda sobre l'asturianu na Universidá d'Uviéu

Pablo R. Guardado El llunes, a les 18 hores na Facultá de Formación del Profesoráu y Educación de la Universidá d'Uviéu, va tener llugar una mesa redonda sobre la situación del asturianu na institución. El Conseyu d’Estudiantes entama esta iniciativa. ‘Llingua asturiana na Universidá d'Uviéu: ¿Y agora, qué? Necesidaes y estratrexes pa la normalización del asturianu na universidá’ ye’l nome d’esta actividá na que van participar Xosé Antón González Riaño, académicu, direutor de la UABRA y profesor; Xulio Viejo, profesor y miembru del Seminariu de Filoloxía Asturiana; Llucía Menéndez Suárez, de Xunta Moza; y Inaciu Galán, presidente del Conceyu Universitariu pol Asturianu (CUPA) y de la organización cívica Iniciativa pol Asturianu. Según señalen dende’l Conseyu d’Estudiantes de la Universidá d’Uvíeu, l’oxetivu d’esta mesa redonda ye xuntar “a los sectores universitarios y sociales principales que trabayen pola normalización de la llingua asturiana na universidá, col envís de reflexonar sobre la situación presente del idioma na nuestra institución académica –tanto del puntu de vista del so usu como del so estudiu–, arriendes de les posibilidaes y estraxes futures nel camín pa la so normalización”. Na opinión d’esti coleutivu d’estudiantes universitarios, el perfil de les cuatro persones convidaes a participar nesta iniciativa convierten esti alderique “nuna oportunidá perbona p'axuntar reflexón y aición al rodiu del asturianu nel nuestru ámbitu universitariu y social”. Dende’l Conseyu d’Estudiantes inviten a tolos miembros de la comunidá universitaria y toda persona esmolecía pol futuru de la llingua asturiana a participar nesta mesa redonda. Fonte: Asturies.com