El conceyu de Nava anuncia les “II Xornaes de Música Tradicional”, que van tener llugar nel conceyu los díes 3, 4 y 5 d'ochobre
Cartelu de les "XII Xornaes de Música Tradicional" de Nava
Les Xornaes van empezar la tarde del vienres con xuegos tradicionales asturianos, siguíos a les 18:00h. del actu de presentación de les mesmes y la mesa redonda “La gaita asturiana: nuevos repertorios pal sieglu XXI”, que xunirá pa falar sobre esta tema a gaiteros, compositores y luthiers del nuesu instrumentu.
La mañana del sábadu va empezar cola presentación a les 11:00h na Casa de Cultura “Marta Portal” del llibru “Alborada II. Métodu de gaita asturiana” de Flavio Benito, siguida a les 12:00h. de la charra “La música tradicional de Bretaña” y una masterclass de guitarra folk, al cargu de miembros del grupu bretón “Alambig Elektrik”.
La tarde va empezar cola inauguración a les 16:00h del “II Alcuentru de Luthiers d'Instrumentos Tradicionales Villa de la Sidra siguíu de l'actuación del grupu folclóricu “La Flor del Pumar”.
A les 18:00 va dar empiezu'l ”II Alcuentru de Bandes de Gaites LaKadarma”, nel que van participar les bandes BG Xácara (Uviéu), BG Candás, el Grupu de Percusión Tocándar (Marinha Grande – Portugal) y la anfitriona, LaKadarma.
A les 22:30 va dar empiezu la Nueche Folk colos asturianos Cerezal, siguíos del consagráu grupu Felpeyu. Van ciarrar la nueche el bretones Alambig Elektrik, una de les formaciones punteresdel momentu na Bretaña Francesa y atópase en plenu llanzamientu del so segundu trabayu discográficu “Vorlenn's Stomp”, onde van texendo la so música de base tradicional con blimes como'l hip hop, el funky o'l hardcore.
Anguaño les II Xornaes de Música Tradicional de Nava rinden tributu asina a la música tradicional de Bretaña, nación cola que Nava caltien una estrecha rellación al traviés de la so hermanamientu col conceyu bretón de Cloars-Carnoët.
Les Xornaes van rematar el domingu col “II Concursu La Kadarmada”, eventu festivu en clave d'humor pa gaita y percusiones. Fonte: Infoasturies.net
