La Fundación José Cardín entama la "BIBLIOTECA DIGITAL MALIAYA"

La Fundación José Cardín entama la ‘Biblioteca Digital Maliaya’ Por Pablo R. Guardado. Yá ta disponible na rede pa tolos usuarios la ‘Biblioteca Digital Maliaya’, ferramienta que permite consultar y descargar too tipo de documentos venceyaos con Villaviciosa. La Fundación José Cardín Fernández ye la impulsora d’esti proyeutu. D’esta forma, esta institución con sede en Villaviciosa “quier contribuyir a averar a la ciudadanía’l so patrimoniu bibliográficu y documental, de manera que pueda consultalo, imprimilo, descargalo y, en definitiva, utilizar toles ferramientes que se ponen a la so disposición mediante l’usu cada vez más ampliu y más avanzáu de les teunoloxíes de la información y de la comunicación aplicaes a la información bibliográfica”, espliquen dende la Fundación. Llibros, revistes o artículos electrónicos, actes, tesis, trabayos d’investigación espublizaos o non, bases de datos, páxines de periódicu y d’otres espublizaciones, rexistros institucionales, informes téunicos, semeyes y postales, oxetos históricos dixitalizados, mapes y anuncios comerciales son dalgunos de los conteníos que toles persones interesaes van tener a mano con namái pulsar un botón. Hai que destacar que caún de los fondos de la ‘Biblioteca Digital Maliaya’ va acompañáu d’una ficha téunica con información bibliográfica d’interés. Con esta iniciativa, la Fundación José Cardín pasa a formar parte del movimientu internacional ‘Open Access Initiative’, nel que participen importantes instituciones de tol mundu, que promueve l’accesu llibre a la lliteratura científica, incrementando l’impautu de los trabayos desendolcaos polos investigadores y contribuyendo a meyorar el sistema de comunicación científica y l’accesu al conocimientu. Pa que la ‘Biblioteca Digital Maliaya’ algame los sos oxetivos y tenga un funcionamientu afayaizu, creóse un Conseyu Asesor formáu por espertos que faen un siguimientu periódicu de los trabayos, marquen el ritmu d’incorporación de documentos nuevos y asesoren na búsqueda de materiales pa la so dixitalización, ente otros asuntos. El primer Conseyu Asesor del proyeutu ta compuestu por Víctor García de la Concha, direutor del Instituto Cervantes y presidente de la Fundación José Cardín Fernández; Evaristo Arce Piniella, periodista y conservador del Grupo Masavéu; Senén Rivero Cueto, escritor y espertu n’historia llocal; José Manuel Valdés, escritor y llibreru; Luis Casteleiro Oliveros, profesor de Filoloxía de la Universidá d’Uviéu; y Víctor Fernández Coalla, direutor de la Fundación José Cardín Fernández. La presentación oficial de la ‘Biblioteca Digital Maliaya’, aplicación web programada por Araz, empresa editora d’Asturies.com, va ser presentada de forma oficial el xueves, a les 13 hores, nel aula de la Fundación José Cardín Fernández. Fonte: Asturies.com