Samartín acueye una charra sobre normalización llingüística nel asociacionismu

L’actu enmárcase dientro de la Selmana del Asociacionismu que se celebra estos díes en Samartín

Esti xueves 31 a les 19 h. na Casona del Bravial continúen los actos de la Selmana del Asociacionismu en Samartín del Rei Aurelio cola charra “Normalización llingüística y asociaciones: los beneficios de trabayar en xunto” . Nesta charra va faláse-yos a les asociaciones de los recursos de los que disponen pa poder llevar a cabu los sos proyeutos en llingua asturiana, tanto a nivel alministrativu (sovenciones, cumplimentación d’impresos, documentación necesaria...) como a nivel llingüísticu (revisión ortográfica de los testos, redacción de los proyeutos, etc.). Amás d’ufierta-yos esta información, tamién se van poner como exemplu otros trabayos y proyeutos que yá desendolcaron munches asociaciones del conceyu n’años pasaos en collaboración con esti serviciu. Lo que se pretende con too ello ye animar a estos coleutivos a llevar a cabu actividaes que supongan una contribución a la promoción y normalización social del asturianu.

Charra 'Normalización llingüística y asociaciones: los beneficios de trabayar en xunto'

A cargu d'Hugo Cortina Fanjul, responsable de la Oficina de Normalización Llingüística de Samartín del Rei Aurelio. Esta actividá ta encuadrada dientro de la Selmana del Asocianismu en Samartín del Rei Aurelio. A les 19 hores na Casona del Bravial (Blimea).

Fontes: asturnews, asturies.com