24/5/12

Fala Non Caduca va asoleyar un EP col nome "Al altu la lleva"

Fala Non Caduca va asoleyar en xunu un EP col nome ‘Al altu la lleva’ Por Pablo R. Guardado Los ḷḷenizos Fala Non Caduca van asoleyar nel mes de xunu un EP con seis cantares que lleva’l nome de ‘Al altu la lleva’. La banda ska-rock-folk va presentalu con dos conciertos, el primeru d’ellos el día 14 nel Tierra Astur de Cualloto. Ésti ye’l segundu EP qu’espubliza Fala Non Caduca –el so debú foi ‘Llingua afilada’ (2008)– y el primer trabayu d’estudiu tres el discu ‘Tiempu de povisa’ (2010), nel que collaboró Iñaki, vocalista de Betagarri, una de les bandes referentes de los asturianos, amás de dellos artistes asturianos como Mapi Quintana y les integrantes de GPS, ente otros. En ‘Al altu la lleva’ los ḷḷenizos dan un pasu más na so evolución musical y consolídense como ún de los grupos de la escena rock n’asturianu con más proyeición. Editáu por Algamar Producciones y grabáu nos Dynamita Studios de Llugones ente los meses de marzu y abril con Dani G. como téunicu de grabación y el propiu Dani y Adrián González encargándose de la mezcla y masterización, l’EP va tar a disposición de los siguidores de la banda’l 14 de xunu coincidiendo cola folixa prevista nel Tierra Astur de Cualloto (23 hores) pa presentar el trabayu. Sicasí, Fala Non Caduca tien colgáu nel so myspace un adelantu del discu, el cantar ‘Escoyer el camín’. Les persones que nun puedan acudir a la espicha-conciertu, van tener otra oportunidá de sentir ‘Reggae-ska’, ‘Llingües’, ‘Tolo que se calla’, ‘La conquista’l pan’ y ‘L’ecu les aguyes’, xunta a otres canciones clásiques de la banda, el 16 de xunu na Sala La Palmera de La Pola Ḷḷena a partir de les 23.30 hores. Fonte: Asturies.com

2 comentarios:

Los comentarios tán pendientes de moderación. Espublizaránse lo primero dable.