6/1/10

Software llibre n'asturianu nel Conseyu de la Mocedá d'Uviéu


El Comité Executivu del CMU aprebó instalar software llibre n’asturianu nes sos dependencies, solicitando al Ayuntamientu que faiga lo mesmo con toles dependencies públiques. La propuesta de resolución foi presentada por Fai!.

Fai! presentó d’urxencia una propuesta de resolución nel últimu Comité Executivu cellebráu’l día 30 d’avientu, na que se desplicaba la diferencia ente software llibre y privativu y s’afalaben les virtúes de los sistemes basaos en GNU/Linux, como ye’l casu d’Ubuntu, qu’amás ta íntegramente tornáu al idioma asturianu. Arriendes de la so aprobación, tolos equipos del Conseyu van tornase al S.O. llibre "Ubuntu".

La propuesta de Fai! pidía que dende’l propiu Conseyu se punxeren en contautu cola comunidá asturiana de software llibre, Softastur, pa sondear la posibilidá de facer dalgún taller d’instalación en collaboración n’espacios públicos d’Uviéu, asina como pa que’l presidente del CMU solicitare a les instancies afayadices del Ayuntamientu la integración del software llibre nos equipos del conceyu d’Uviéu, lo mesmo nos d’accesu públicu como nos de tipu alministrativu.

Pa finar, la organización soberanista dio anuncia que va siguir treslladando esti mesmu discursu a les instancies del restu de Conseyos de la Mocedá d’Asturies pa que’l software privativu dexe de ser realidá nes alministraciones públiques asturianes.

Fonte: Aruelu.com

No hay comentarios:

Publicar un comentario

Los comentarios tán pendientes de moderación. Espublizaránse lo primero dable.