Les biblioteques xorrecen n'usuarios, visitantes y préstamos

Acúdese una media de cuatro vegaes al añu n’España.
Les biblioteques xorrecieron un 10,1% nel so númberu d’usuarios inscritos ente los años 2006 y 2008 asina como nel númberu de visitantes (un 5,0%) y nel préstamu de documentos (un 9,1%), según se desprende de la Estadística de Bibliotecas.

Según esti informe, caltiénse la pauta d’años anteriores de continuu medre de la demanda de servicios bibliotecarios y de progresivu procesu de modernización de les biblioteques.

El númberu de visitantes declaraos incrementóse un 5,0% respeutu a l’anterior Estadística de Bibliotecas de 2006, algamando los 204,36 millones. Esto supón que cada habitante acudió a una biblioteca una media de 4,48 vegaes demientres l’añu 2008. Por comunidaes autónomes, les mayores tases de visitantes por habitante diéronse na Comunidá Foral de Navarra (7,79), Rexón de Murcia (6,91) y Cantabria (6,77).

El porcentaxe de población usuario de biblioteques foi del 35,7%, énte’l 34,0% de 2006. Por comunidaes autónomas, les mayores proporciones de población usuario de biblioteques llocalizáronse en Castiella-La Mancha (50,9%), Cataluña (50,5%) y Castiella y Lleón (50,4%).

Préstamu de llibros

Nel añu 2008 los usuarios de bibliotecas tomaron en préstamu domiciliariu 74,47 millones de documentos, lo que supón un incrementu del 9,1%. La media estatal foi de 1,63 préstamos domiciliarios por habitante.
Les mayores tases de préstamos por habitante asitiáronse en Castiella y Lleón (2,90 documentos por habitante), Comunidá Foral de Navarra (2,53) y Cataluña (2,50) y el documentu más solicitáu foi'l llibru, col 64,2% de los préstamos y un aumentu del 9,0%. Siguiéron-y los préstamos de documentos audiovisuales y sonoros.

Internet afiánzase

Amás, l’informe calca na consolidación del usu de les nueves teunoloxíes nes biblioteques españoles. Asina, la proporción de biblioteques con accesu a Internet algamó’l 87,7comparante col 42,3% rexistráu nel añu 2000. Nes biblioteques públiques esti porcentaxe elevóse fasta’l 93,4%.
El 23,7% de les biblioteques disponía de páxina web y recibieron 315,58 millones de visites, un 13.2% más que nel 2006. Amás, el 40,6% ufiertó’l so catálogu de fondos al traviés d’Internet, cifra superior nun 11,2% a la de 2006. El porcentaxe pa les biblioteques públiques asitióse nel 41,8%.
Per otru llau, la utilización d'ordenadores cada vegada ta más xeneralizada. En 2008 el 91,1% de les biblioteques poseyía ordenadores pa la so xestión interna y el 78,3% pa usu públicu esclusivo.

Les biblioteques clasificáronse nel añu 2008 nuna biblioteca nacional, 4.125 públiques, 1.904 especializaes, 259 de grupos específicos d’usuarios, 304 d’instituciones d’enseñu superior y ocho biblioteques centrales de comunidaes autónomes.
La mayor parte les biblioteques son de titularidá pública (el 81.6% del total). L’Alministración llocal soporta’l mayor númberu d’elles (4.052 biblioteques, el 47,5% del total), siguida de l’Alministración Autonómica (el 20,9%), l’Alministración Xeneral del Estáu (el 9,8%) y de les Diputaciones Provinciales y Cabildos Insullares (el 7,4%).
El personal en plantiella de les biblioteques españoles taba compuestu por 24.308 persones nel añu 2008. D’ellos, 7.177 yeren bibliotecarios profesionales.

Fonte: Europa Press