La diputada de Podemos Asturies demandó proteición pa la DOP 'Sidra de Asturias' frente al TTIP “si queremos qu'ésta tenga un futuru nidiu y una dimensión más allá de la nuesa comunidá autónoma”. Paula Valero acudió al Salón de la Sidra DOP.
Ésti celebróse'l martes en Mieres cola participación de tolos profesionales del sector y representantes de l'Alministración col oxetivu de presentar la collecha nueva de sidra asturiana con denominación d'orixe protexida (DOP) y entregar los gallardones añales del Conseyu Regulador de 'Sidra de Asturias'. Asina, Emilio Martínez llevó'l de 'Meyor Sidra Esplumoso'; Españar, el de 'Meyor Sidra Natural Filtrao'; y Valdeboides, el de 'Meyor Sidra Natural'.
Pedro Quirós, pela so parte, resultó gallardonáu como 'Meyor Productor de Mazana', y Enrique Castro 'Quini' foi nomáu embaxador de 'Sidra de Asturias'. Sobre los datos d'esta collecha, el Conseyu Regulador anunció un aumentu de la producción na collecha 2015 del 74,03 por cientu, a lo qu'hai que sumar un aumentu de les ventes nel primer semestre del añu del 3,63 por cientu. El númberu d'etiquetes emitíes foi de 1.738.000.
Valero aprovechó la so presencia nel Salón de la Sidra DOP pa recordar que los papeles filtraos por Greenpeace Países Baxos sobre les negociaciones sobre'l TTIP, tratáu de llibre comerciu negociu nel más altu secretru ente Estaos Xuníos y la Xunión Europea, constataron que “les denominaciones d'orixe asturianes nun apaecen dientro'l llistáu de DOP qu'Europa va defender nes negociaciones con EE XX”. Por ello, demandó la so proteición “si queremos qu'ésta tenga un futuru nidiu y una dimensión más allá de la nuesa comunidá autónoma”.
D'igual forma recordó que la DOP ye l'únicu marcu que garantiza l'orixe de la manzana asturiana. Nesi sen, la parllamentaria destacó la necesidá de “potenciar el sector productor de mazana de sidra y ampliar la denominación pa que se puedan incluyir más variedaes".
Nenguna DOP asturiana nel llistáu del TTIP Podemos Asturies vien denunciando y espresando'l so esmolecimientu pol fechu de que de que nun apaeza nenguna DOP asturiana ente las 25 indicaciones xeográfiques a mantener nel TTIP a propuesta del Estáu español. "Nin la sidra, nin les fabes, nin los quesos Cabrales, Gamonéu, l’Afuega’l Pitu o Casín, serán oxetu de defensa de la denominación del orixe de la so producción por parte del Gobierno español nes negociaciones europees con EE XX", lo que la formación morada considera "una perda enforma grave de les garantíes de proteición pa les DOP asturianes".
Fonte: asturies.com
Fonte: asturies.com
Tocantes a sidra refierse nos ta xintando la partida'l país vascu en distribución y vientes, que nin de llueñe en calidá.
ResponderEliminar