La realidá de la concertada pa cola materia de Llingua Asturiana

Carta de matriculación en llingua asturiana nun colexu concertáu

 Si na escuela pública la información a los padres y madres sobre la matriculación na materia de Llingua Asturiana y Gallego-asturiano nun ye la más afayadiza, ésta agrávase enforma na concertada. Son munchos los centros qu'usen 'lliteratura' p'afalar a que los neños faigan 'Cultura Asturiana'.

 Ye'l casu de la nota unviada a les families pa la matriculación del cursu vinienente que se pue ver na imaxe. Trátase d'un colexu concertáu del centru del país na que nel área del bloque d'asignatures de llibre configuración autónomica faen una esplicación qu'incita ensin dulda a la escoyeta de 'Cultura Asturiana'. Asina, el testu apunta que "la 'Llingua Asturiana' consistirá nel enseñu de la mesma. Na 'Cultura Asturiana' estudiaránse aspeutos de la nuesa rexón en castellanu, utilizando delles metodoloxíes. Nesta área reforzaremos tamién tamién el conteníu de Ciencies Sociales".

 Con esta redaición nun hai dulda de que 'Cultura Asturiana' paez una materia más completa que 'Llingua Asturiana', afalando a los padres y madres a escoyer la primera al tener suspuestamente más conteníu. Nesti puntu ye preciso recordar, que 'Cultura Asturiana' tien un currículu marcáu pola Conseyería d'Educación y Cultura, polo que los maestros nun deberíen salise del mesmu por decisión de la direición del centru.

 Ésti ye sólo un exemplu de los munchos que se dan n'Asturies en colexos concertaos y qu'espliquen la baxa matriculación en 'Llingua Asturiana y Lliteratura' nestes escueles. N'otros sitios los responsables 'venden' l'asignatura alternativa col usu de ferramientes informátiques nella y otros, direutamente, traten de convencer a les families col argumentu de que'l neñu o neña va tar solu en clase porque'l restu escueye 'Cultura Asturiana'.

 Aparte del componente ideolóxicu, predominante en munchos casos, hai que sumar tamién l'económicu. 'Cultura Asturiana' suel tar impartida por maestros del centru ensin formación nin preparación nenguna, mentes que pa dar 'Llingua Asturiana y Lliteratura' ye necesaria la titulación requerida, polo que tienen que facer contrataciones. Lo cierto ye qu'ésta ye una situación grave condena a munchos neños y neñes a medrar ensin tener conocimientos de la llingua propia, colo qu'ello conlleva pa la sobrevivencia del asturianu.       Fonte: asturies.com