Bimenes entama una selmana d'actividaes previa a la declaración de la oficialidá nel conceyu del 2 de xunetu

Cartelu XX Fiesta pola Oficialidá

  La XX Fiesta de la Oficialidá, cita onde l'Ayuntamientu de Bimenes va declarar otra vuelta la oficialidá de la llingua asturiana nel conceyu yerbatu, va tar precedida d'una selmana con actividaes tolos díes. El sábadu 2 de xunetu van tar presentes en Martimporra l'alcalde de Miranda de l Douro, Artur Nunes, y dellos cargos públicos de tol país.

  Al meudía d'esi sábadu un Plenu Municipal Estraordinariu al aire llibre va abrir los actos festivos. Nél va declarase otra vuelta la oficialidá del idioma nel conceyu yerbatu, depués de que la del 1997 fora anulada pol Tribunal Superior de Xusticia d'Asturies, al igual que les d'otros conceyos del país que siguieron el camín de Bimenes, tres la intervención de la Delegación del Gobiernu estatal n'Asturies. Una vegada fináu'l Plenu, a les 12.30 hores, l'alcalde Aitor García Corte va facer una declaración institucional acompañaú pol primer edil de Miranda de l Douro.

  Depués va ser el turnu de la intervención de dellos cargos públicos de toda Asturies que vienen sofitando la campaña 'Conceyos pola Oficialidá', pa darréu dar pasu a la Danza de la Oficialidá y a un pasucais protagonizáu pol Ensame de Música Tradicional Los Yerbatos y l'Associaçao Mirandanças. Dambes formaciones van actuar a les 13.30 hores nel prau del Palaciu del Marqués de Casa Estrada, onde a les 14.30 hores empieza la xira popular y va instalase un Mercáu Yerbatu.

  Yá de tarde, a les 17 hores, ta prevista la celebración del III Concursu d'Escanciadores, prueba puntuable pal Campeonatu d'Asturies d'Echadores de Sidre. Mientres los mayores disfruten del bon facer de los meyores profesionales del país, la reciella va poder divertise con xuegos tradicionales.

  A les 21 hores va celebrase una cena nel prau na que, al igual que cola xinta, pue trayese de casa la comida –non asina la bébora–. Darréu, a les 22 hores, va celebrase 'Bimenes en danza' con Cantaruxare, Los Yerbatos y l'Associaçao Mirandanças, pa finar col conciertu de Tsarigando y Alienda (23.30 hores).

Ruta, televisión y música  Les actividaes pol venti aniversariu de la Fiesta de la Oficialidá, sicasí, van principiar el llunes, con eventos tolos díes de dellos tipos. Una ruta pela Sienda los Molinos va abrir esti ciclu especial, pa continuar el martes cola grabación d'un programa de televisión na Casa les Radios y siguir con un taller de Wikipedia y música y baille con Los Yerbatos , el miércoles; cantares con Ente Muyeres y Peña Carese, el xueves; y cine n'asturianu, el vienres.                                                                              Fonte: asturies.com

Adxuntu	Tamañu
programa_xx_fiesta_pola_oficialida.jpg	1.08 MB