Inaciu Galán recibe esti llunes el Premiu Pepe Campo de monólogu pol testu “Les coses de la política nueva”

Inaciu Galán va recibir esti llunes el Premiu Pepe Campo de monólogu pol testu “Les coses de la política nueva” que-y diera a algamar un gallardón qu’entrega dende va más de doce años la Sociedá d’Humanitarios de Samartín.

La Sociedá d’Humanitarios de Samartín va entregar esti llunes 6 de xunu, dientro de la so X Selmana Cultural, el Premiu Pepe Campo de monólogu 2016, al periodista y escritor Inaciu Galán, pol testu “Les coses de la política nueva”. L’actu va celebrase nel Centru Cultural de Morea (Ayer) de magar les 19:30 hores cola presencia del autor y del actor Lluis Antón González, que va faer una llectura dramatizada del testu ganador.

Galán esplicó al conocer la noticia “Pa min ye un honor recibir otra vegada esti premiu y fáigolo cola mesma ilusión que’l primeru. Préstame ver que’l premiu sigue recibiendo munchos orixinales cada añu y que’l xéneru del monólogu sigue vivu y tien cuerda pa llargo, porque ye una parte importante de la tradición lliteraria y teatral de la cultura asturiana y una ferramienta que sirvió pa la tresmisión del nuesu idioma en momentos perdifíciles”. Sobre’l monólogu col que ganó cunta “El testu xira alredor de la situación que se vive anguaño na política, colos partíos nuevos y les situaciones que se tán dando, un testu mui d’actualidá a pocos díes de les eleiciones”.

Ye la quinta ocasión na qu’Inaciu Galán se fai con esti gallardón, la última en 2013. Ente’l palmarés de ganadores d’esti premiu, que busca afalar la creación de testos venceyaos a l’actualidá y la continuidá d’un xéneru bien importante n’Asturies, tán monologuistes como Carlos Alba ‘Cellero’, Benxa Pérez, ‘El Maestru’ o José Alfonso González Castellanos. El Premiu recuerda la figura del escritor ayerán Pepe Campo, que dexó a la so muerte en 1992 una llarga obra de monólogos y poesíes de calter popular. El xuráu del premiu tuvo conformáu pol miembru de l’Academia de la Llingua Asturiana, Pablo Xuan Manzano, l’escritor Ánxel Álvarez Llano y el músicu Octavio Trapiello.

Inaciu Galán ye periodista, escritor y presidente d’Iniciativa pol Asturianu. Venceyáu dende va más d’una década a la renovación del monólogu asturianu, sobre manera como escritor, pero tamién en delles ocasiones como monologuista sobre los escenarios, ye’l coordinador de dos antoloxíes titulaes “Pa eches unes rises”, qu’asoleyó la editoral Trabe en 2008 y 2011 y nes que Galán fai por recoyer lo meyor del xéneru nos años caberos.

Fonte: Asturnews