Asturies estrecha llazos con Miranda

Cartelu II  Jornadas de Lingua e Cultura Mirandesa "Amadeu Ferreira"

   Esta fin de selmana celébrase en Miranda de l Douro les II Jornadas de Língua e Cultura Mirandesa 'Amadeu Ferreira'. Espertos y autores mirandeses y asturianos van participar en conferencies, alcuentros y presentaciones. Tamién hai espaciu pa un 'Mercado Astur-Mirandés' y un hermanamientu con Bimenes.

  El Município de Miranda de l Douro y la Associação de Língua e Cultura Mirandesa entamen esta iniciativa que va repartise ente'l Largo D. João III, la Câmara Municipal y la Casa da Língua Mirandesa col oxetivu de ser un alcuentru añal de trabayu y desarrollu de la llingua mirandesa, perteneciente al tueru asturlleonés. D'igual forma, pretende ser un homenaxe a Amadeu Ferreira, ex presidente fináu recientemente de l'l'Associaçon de Lhéngua Mirandesa.

  La inauguración del 'Mercado Astur-Mirandés', a les 21 hores de güei, va abrir estes xornaes, actu nel que van actuar Pauliteiros y Los Yerbatos. Ésti va contar con doce espositores con productos típicos mirandeses y asturianos. Darréu, a les 21.30 hores, l'alcalde Artur Nunes va dar el discursu inaugural na Casa da Lhéngua.

  Pa la mañana del sábadu ta previsto un actu d'hermanamientu con Bimenes, a la que va asisir l'alcalde yerbatu, Aitor García Corte, pa depués comenzar coles xornaes en sí. Tres la exhibición del videu 'L'asturianu, una llingua milenaria' va dase pasu a la intervención de los convidaos asturianos. Asina, Ana María Cano va falar de 'L'orixe de la llingua, los primeros testos; Xosé Lluis García Arias, de 'L'asturianu na dómina medieval'; Xosé Ramón Iglesias Cuevas, de 'La lliteratura moderna n'asturianu'; Marta Mori, de 'La importancia simbólica de Xovellanos y les primeres antoloxíes'; y Xosé Antón González Riaño, de 'La recuperación llingüística del asturianu dempués de la dictadura (Conceyu Bable y ALLA). La vindicación de la oficialidá'. L'alcalde de Miranda de l Douro va zarrar esta estaya cola intervención 'Les posibilidaes de futuru, collaboración ente Asturies y Miranda'.

Mitoloxía, xuegos tradicionales y gaita       Fuera del terrén llingüísticu, tres una intervención nueva de García Arias entitulada 'Falemos del dominiu astur' y otres sobre'l mirandés, Alberto Álvarez Peña va averar la mitoloxía asturiana a los presentes, mentes que Carlos Suari va tratar sobre'l 'Xuegu y deporte tradicional n'Asturies' y Pedro Pangua de 'L'oficiu de gaiteru n'Asturies'. Por último, el domingu va celebrase l'alcuentru d'autores mirandeses y asturianos, nel que van tomar parte Marta Mori, Xuan Bello, Antón Caamaño ya Ignaciu Llope.                                                                                              Fonte: asturies.com