Miranda de Douro acoyó les II Jornadas de Língua e Cultura Mirandesas “Amadeu Ferreira”

Miranda do Douro

  Esti pasáu fin de selmana, los díes 17, 18 y 19 de xunu, tuvieron llugar en Miranda de l Douro les II Jornadas de Língua e Cultura Mirandesas”Amadeu Ferreira” nes que la conexón de la Tierra de Miranda con Asturies foi la exa principal y onde’l Dominiu Llingüísticu Ástur tuvo un papel cimeru.
La Cámara Municipal de Miranda de l Douro y l’Associação de Lhéngua i Cultura Mirandesa entamaron esti alcuentru añal al rodiu del mirandés y que fai homenax a la figura del recién desapaecíu Amadeu Ferreira, gran defensor y divulgador del mesmu. Dientro de les actividaes de les xornaes, y como resultáu del protocolu que se robló l’añu pasáu ente la Cámara Municipal de Miranda de l Douro, l’Associaçon de la Lhéngua i Cultura Mirandesa y l’Academia de la Llingua Asturiana, presentóse’l videu L’asturianu, una llingua milenaria, nel que se fala de la historia de la llingua asturiana, sofitándose n’entrevistes a especialistes de la materia. Nél faise un percorríu dende los oríxenes del asturianu hasta’l momentu de güei. Les pallabres del alcalde mirandés alredor de la llingua ya identidá de la Tierra de Miranda y de les rellaciones con Asturies y cola ALLA zarren esti documental.

  Per otra parte, dientro de les conferencies programaes pal sábadu 18, xunto con delles de temática mirandesa, hebo igualmente delles intervenciones sobre aspeutos de la llingua y la cultura asturiana, ente la que destacó la del profesor García Arias sobre’l dominiu llingüísticu ástur. Pela so parte, Berto Peña faló de cuestiones al rodiu de la mitoloxía asturiana y como conferencia cabera del día, la intervención de Pedro Pangua sobre l’oficiu de gaiteru n’Asturies.

  Nesta xornada del sábadu tuvo llugar tamién la presentación de la revista “Studos de Lhéngua i Cultura”. Nesti primer númberu podemos alcontrar, ente otros, artículos de Xosé Lluis García Arias, Xandru Martino y Roberto González-Quevedo, sobre cuestiones de llingüística, lliteratura y cultura asturiana, respeutivamente.

  Finalmente, el domingu 19 pela mañana, tuvo llugar na Casa de la Lhéngua un alcuentru con escritores asturianos. Nesti actu, que contó cola participación de Marta Mori, Xuan Bello, Ignaciu Llope y Antón Caamaño, los asistentes pudieron conocer la un balance de la situación actual y perspeutives de futuru de la lliteratura asturiana de la mano d’estos escritores ya investigadores nomaos.                                      Fonte: asturnews.com