El PP refuga otra vegada l'usu de les llingües oficiales nel Senáu

El portavoz del PP nel Senáu, José Manuel Barreiro, volvió refugar l'usu de les llingües autonómiques nos Plenos del Senáu, qu'esixe'l recursu a la traducción simultánea al traviés de pinganillos, y añadió qu'espera qu'esti asuntu se debata dientro de la ponencia creada pa reformar les funciones de la Cámara. El portavoz esplicó que nun parllamentu nel que toos puen comunicase nuna mesma llingua «nun tien sentíu» que se deba que recurrir a «nengún otru preséu» pa entendese. Amás, refugó l'argumentu de qu'asina se defende meyor les llingües autonómiques, porque al so xuiciu, ye abondo con podeles emplear na Comisión Xeneral de Comunidaes Autónomes.

El Senáu reformó la llexislatura pasada'l so Reglamentu pa dexar a los parllamentarios emplegar el vascu, el catalán y el gallegu nel debate de les mociones nos Plenos. Esta novedá contó col votu en contra del PP, que sicasí nun utilizó la so mayoría absoluta actual pa dar marcha atrás. Hasta entós, estes llingües podíen emplease namás na Comisión Xeneral de Comunidaes Autónomes, na que puen participar amás representantes de los gobiernos autonómicos.

A Barreiro preguntáron-y pol votu en contra del PP a la propuesta presentada nel Congresu por UPyD pa eliminar l'usu de la traducción simultánea, que tien un costu reflexáu nos Presupuestos Xenerales. «El debate tien de dase nel Senáu y nel marcu d'esa ponencia de reforma», afirmó.

Fonte: Les Noticies