Soliciten que la Biblioteca del Natahoyo esponga al públicu la seición asturiana

El portavoz de Compromisu por Xixón Daniel Fernández, fexo público que la organización solicitó al Ayuntamientu Xixón que la Biblioteca del Natahoyo dexe l’accesu llibre a la seición asturiana, qu’anguaño atópase en depósitu y obliga a los usuarios a solicitar les sos obres y nun dexa conocer los fondos de la mesma.

________________________________________

Dende Compromisu por Xixón punxéronse en contactu cola biblioteca del Natahoyo ante les informaciones d’usuarios de que la sección asturiana nun taba a llibre disposición, pa solicitar que tales obres tean abiertes al públicu. La respuesta de la biblioteca foi negativa alegando falta d’espaciu y que se deriva a la biblioteca de La Calzada a aquelles persones que quieran aportar a una sección asturiana llibremente.

Pa Compromisu por Xixón “si esiste bona voluntá per parte de la Biblioteca del Natahoyo tamos convencíos que van atopar espaciu pa dexar accesu abiertu a la sección asturiana” ya que’l portavoz de Xixón afirma que “muncha xente va a les biblioteques ensin una idea preconcebia y escueyen la so llectura acordies con lo que tienen en llibre accesu, lo que dexa a la lliteratura asturiana y n’asturianu nun segundu planu”.

Compromisu por Xixón tamién recuerda que les Alministraciones Públiques “tienen la obligación de fomentar l’usu del asturianu, y nun creemos que tener en depósitu la sección asturiana na Biblioteca del Natahoyo vaya nesa dirección precisamente”.

Por tou lo dicho “solicitamos l’accesu llibre a la sección asturiana al Conceyu de Xixón ante la negativa de la biblioteca del Natahoyo de atender nuesu pidimientu” y esperamos “tener una respuesta positiva a la nuesa demanda per parte del gobiernu municipal de Foru, tantu por sensibilidá escontra la nuesa cultura como por cumplir la obligación llegal de fomentu del usu del asturianu” concluyó Daniel Fernández.

Fonte: Infoasturies