Piden mayor compromisu colos Servicios de Normalización Llingüística

DAMIÁN BARREIRO . UVIÉU -
Depués de que se diera a conocer que pal 2013, el Gobiernu asturianu va recortar nun 20% el presupuestu de los Servicios de Normalización Lliguïstica (SNL), la Xunta pola Defensa de la Llingua Asturiana (XDLA) pide a los Conceyos que cuenten con un serviciu que muestren el so compromisu con estes entidaes. Pa ello, la organización esixe a les alministraciones locales que collaboren cola alministración autonómica pa permitir el mantenimientu de los 14 SNL qu'actualmente hai n'Asturies, «dalgo que, amás de xenerar alredor d'una ventena de puestos de trabayu directos y munchos indirectos al traviés de la elaboración de materiales, permite ayudar a salvar un patrimoniu inmaterial del que ye dueñu tola ciudadanía d'esti país, anque correspuende-y a los políticos ufrir los preseos afayadizos pa asegura-y un futuru».


La organización reconoz que son tiempos difíciles y que los recortes tán afectando a toles estayes, «pero ye qu'estos recortes tán cebándose con too aquello que tien l'asturianu como llingua d'usu». Asina, recuerden qu'anguaño, les ayudes a les entidaes qu'utilicen el nuestru idioma sufrieron un recorte de más del 60%. La XDLA diz que nun quier ver nestes midíes nengún intentu d'acabar coles empreses «que dende hai dos décades tán faciendo un trabayu que desdexo'l mesmu Gobiernu asturianu», añaden que quieren más pensar que ye un desconocimientu dafechu de la realidá y de que la industria cultural n'asturianu xenera cientos d'empleos, «anque triste ye una Alministración que nun conoz la realidá del territoriu que gobierna»

Asina, recuerden qu'amás d'una llingua con derechos, l'asturianu ye un sector económicu que da de comer a un bon númberu de persones, «polo que nun se pue entender la defensa que fai'l Gobiernu d'otros sectores productivos del país, mentes afueguen a la industria cultural, cuando según los estudios ye ún de los sectores económicos con más proyección de futuru».

Por too ello, dende la XDLA piden al Gobiernu asturianu un mayor compromisu col funcionamientu y estabilidá d'estos servicios, «pero sobre too, un mayor compromisu a les entidaes locales. Asina, recuerden que la normalización del nuestru idioma, les campañes a realizar y los puestos de trabayu xeneraos pol SNL, dependíen namás y esclusivamente de les perres que daba'l Gobiernu asturianu y de lo qu'estes durasen, «porque una vez acabaes, l'asturianu y los puestos de trabayu, en munchos de los casos, nun importaben a nengún conceyal nin a nengún alcalde».

Otra manera, depués d'una década desque empezaran a funcionar los primeros SNL, la organización diz que sería menester que dende la Dirección Xeneral de Política Llingüística iguaren una figura xurídica que diera estabilidá a estes entidaes, «dalgo qu'amás diba permitir una mayor coordinación pa entamar campañes y que diba abaratar los costes de les mesmes». Amás, recuerden la inestabilidá de los trabayadores, «que namás son contrataos hasta final d'añu y que nun saben cuánto tiempu van tar nel so puestu de trabayu, dalgo que tamién impide facer un proyectu normalizador a plazu llargu y con garantíes de ser evaluable».

Fonte: Les Noticies