Rector y decana de Filoloxía recalquen el so compromisu cola llingua asturiana

El rector de la Universidá d'Uviéu, Vicente Gotor, y la decana de la Facultá de Filoloxía, Cristina Valdés, recalcaron esti martes el so compromisu cola defensa y estudiu de la llingua asturiana dientro del ámbitu universitariu, y del "marcu llegal establecíu", en palabres del propiu máximu responsable universitariu.

Asina lo ficieron, na so intervención nel actu d'inaguración de les XXXI Xornaes Internacionales d'Estudiu de la Llingua Asturiana, qu'entamen conxuntamente la Facultá y l'Academia de la Llingua Asturiana.

El rector, una vez más, remitióse a les nueves titulaciones universitaries de llingua asturiana, llograes mientres el so mandatu, asina como "la bayura d'acciones pa plantegar la so visibilidá". Asina, mostró'l so compromisu en "da-y valir a esti patrimoniu dientro del marcu llegal establecíu".

Nun sen asemeyáu mostróse la decana, qu'espresó'l compromisu de la facultá, "onde s'estudien llingües modernes pa formar especialistes". "Ésta", en referencia a les xornaes, "ye una de les meyores oportunidaes pa siguir ampliando conocimientu", comentó la decana.

Ambos representantes universitarios abrieron asina unes xornaes qu'entamaron cola ponencia de Xosé Lluis García Arias sobre la presencia de rasgos asturianos en testos medievales del Dominiu Ástur, y qu'acabará na so primer xornada cola presentación de los últimos númberos de les revistes Lletres Asturianes y Ciencies, na so edición dixital.

Como cursiosidá, na xornada d'esti miércoles presentaráse, baxo'l títulu 'Tirán el blancu', la versión n'asturianu de 'Tirant lo Blanch', obra por escelencia de la lliteratura medieval catalana y valenciana. Nel actu tará presente'l presidente de l'Acadèmia Valenciana de la Llengua, Ramón Ferrer.

Fonte: Europa Press