Marisa Valle Roso interpreta cantares de xira per Asturies

Marisa Valle Roso: “Entamé na tonada de la mano d’Alfredo Canga gracies al mio hermanu Fernando”

La cantante Marisa Valle Roso (La Felguera, 1987) ta nestos momentos de xira per Asturies interpretando los cantares del so primer discu en solitariu, ‘De lo fondero l’alma’. Esti trabayu yá lleva cerca de 2.000 copies vendíes.

-  Nesti fin d’añu encara la segunda parte de la xira ‘De lo fondero l’alma’.  ¿Ilusionada?
   Sí, toy muy ilusionada y con muches ganes de ver la respuesta del públicu nestos llugares nuevos que visitamos. Nos conciertos anteriores de la xira pasémelo mui bien y disfruté munchísimo nel escenariu, sobre manera pola bona acoyida de públicu.

-  ¿Qué balance fai del primer ciclu de conciertos que dio nel mes de xunu?
   Pa min, personalmente, foi un ésitu, yá non sólo porque acudió un gran númberu de xente, sinón porque los que foron disfrutaron y salieron contentos. Nun hubo conciertu nel que la xente nun se punxera en pie a última hora y eso pa min, pa los mios compañeros Xaime Arias y Rodrigo Sturm, y pa Pablo como organizador de la xira, foi una recompensa pergrande pol trabayu bien fechu.

-  Con estes actuaciones presentaba’l discu ‘De lo fondero l’alma’. ¿Qué tal recibimiento tuvo esti trabayu?
   Yá voi cerca de les 2000 copies vendíes. La verdá ye que toi contenta por vender tantes copies en tan pocu tiempu con un discu de tonada 100 por cientu y, sobre manera, porque tea gustando a neños y xente mozo.

-  Nél toca dellos estilos dientro de la canción asturiana.
   Nel discu atópense dalgunes de les canciones més representatives de los 12 años que llevo dientro de la música asturiana y, como nun podía incluyiles toes, escoyí aquelles coles que pudiera tocar tolos palos de la canción asturiana: ayeranes, d’al altu la lleva, d’autor, arrieres, vaqueires…

-  ¿En cuál se siente más cómoda?
   Nun sabría dici-y. Cada estilo tien una dificultá diferente que m’encanta interpretar.

-  Vusté yá pasó de promesa de la tonada a cantante consolidada. ¿Cuáles foron les sos referencies principales na so etapa de formación?
   Entamé de la mano d’Alfredo Canga y él foi’l que me guió y m’enseñó tolo que yo sé agora mesmu. En cuanto a referencies, ente otros, siempre me llamó especialmente l’atención Orestes Menéndez y el gustu especial que tenía a la hora de cantar.

-  ¿Ayudó'l fechu de tener otru cantante destacáu na familia como ye’l so hermanu?
   Sí, porque si nun fora por él nun principiara nesto, yá que’l primeru que quixo aprender a cantar tonada foi él. Yo comencé medio obligada porque Alfredo sintióme cantar con él el día que lu conoció. Facemos tamién canción a dúu dende qu’entamemos y ye dalgo de nueso que tamién gusta muncho a la xente. Agora mesmu, Fernando ta embarcáu nun proyeutu tamién en solitariu que saldrá a la lluz pronto.

-  ¿Cuál ye’l premiu de los qu’algamó nesti tiempu al que-y tien más afeutu?
   Caún de los concursos a los que m’enfrento ye una meta nueva y por eso toos y caún d’ellos son importantes pa min, pero sinceramente a los que más afeutu tengo son el primeru que gané en categoría absoluta, el de La Nueva, y el primeru dientro de la categoría de ‘Renovación de la tonada’, con dos composiciones de Pablo Carrera, nel Concursu Ciudá d’Uviéu.

-  ¿Ve futuru a la canción asturiana?
   Yo creo que sí. Hai muncha xente mozo que ta empezando a aficionase. Toi dando clases de canción asturiana dientro de l’Agrupación Reija, en Llangréu, y en Llaviana, y tengo, ente otros, unos ocho alumnos menores de 12 años. Eso paezme que ye mui bona señal y una demostración de que va haber xente que nos releve y tire por ello.

-  Volviendo a la xira, ¿incorpora dalguna novedá nestos conciertos con respeuto a los de xunu?
   Sí, igual que nos conciertos anteriores, cada actuación intentemos ameyorala con respeuto a l’anterior. Agora ocurre lo mesmo: pretendemos sorprender al públicu cola inclusión de dalgún videu y temes nuevos. Prestaríame destacar nesta xira’l fechu de da-y una imaxe web a la canción asturiana, con venta d’entraes online, videos, semeyes, cantares, enllaces a otres redes…, pa intentar llegar a un mayor públicu, a la xente mozo, y pa tratar tamién de dir colos tiempos. Realmente, anguaño somos cuatro los qu’utilizamos estos medios dientro de la canción asturiana. Nesti casu, ye’l grupu A Mansalva el que s’encarga d’ello, amás d’otros trámites que conlleva la producción d’esti tipu d’eventos.

-  Lo que sí caltién son los músicos que l’acompañen.
   Sí, nesta xira y nel discu ‘De lo fondero l’alma’ puedo presumir de tener unos compañeros de lluxu. Xaime ye un gran pianista y arreglista, y consigue da-y a les tonaes más pures un aire nuevu y frescu. Nun ye fácil acompañar tonada y él failo perbién. Rodrigo Sturm tien la facilidá de dominar estilos diferentes cola so guitarra, polo qu’encaxa a la perfeición nesta xira y nesti discu. Pablo Carrera, pela so parte, desempeña más d’una función: nun ye sólo un músicu y gaiteru escelente, sinón que ye’l propulsor de la xira y l’organizador de tolo qu’ésta conlleva, que nun ye cosa fácil, dientro del grupu A Mansalva. Pablo, con esta xira, ta consiguiendo da-y a la tonada la imaxe que se merez.

-  ¿Onde vamos poder vela actuar?
   Tuvimos el vienres pasáu nel Cine Marvi de Tinéu y próximamente van poder venos el 25 d’esti mes nel I.E.S Ramón Areces de Grau; el 30, nel centru municipal Xixón Sur; el 7 d’avientu, nel teatru Maripeña de La Felguera; y por último, el 13 d’esi mesmu mes nel Teatru Cine Carmen de Morea.

-  ¿Va embarcase en dalgún otru proyeutu tres esta serie de conciertos?
   Nun me gusta falar de proyeutos futuros porque me presta más dar sorpreses, pero agora mesmu acaba de surdir ‘Quinta del Nalón’, un espectáculu nel que participo xunto al mio hermano Fernando, Anabel Santiago, Héctor Braga y Pablo Carrera, y que tien mui bones mires. Más alantre, fadré más coses xunto al mio hermanu, Fernando Valle Roso.

Fonte:  Asturnews.