Radio Sele en pelligru

La llingua nes ondes en pelligru.


DAMIÁN BARREIRO . UVIÉU

Radio Sele, la emisora uvieína qu'emite la so programación dafechu n'asturianu, ta nuna situación económica bien mala, cuasi ensin presupuestu pa pagar el llocal qu'abelluga los estudios d'esta emisora. La situación pon en pelligru el futuru d'esta frecuencia, convertida col pasu de los años nun símbolu del movimientu de reivindicación lligüística y que llevó nel 2005 el Premiu Andrés Solar, qu'entrega la Xunta pola Defensa de la Llingua Asturiana. Pa intentar iguar esta situación, la páxina web de la emisora ufre un númberu de cuenta -Asociación Cultural Secha (Caja Rural): 2059 0001 18 2366328629- pa los que quieran collaborar económicamente.

Amás, a lo llargo de la fin de selmana, cientos d'asturianos apoyaron el futuru de la emisora al traviés de Twitter col hashtag #SofituRadioSele. Ente ellos munchos asturianistes, pero tamién siguidores del Real Uviéu que recordaben les retresmisiones de los partíos d'esti equipu que la emisora fixo dende'l 2003, nun momentu de crisis pal club carbayón y yá en Tercera División. A esta iniciatica sumáronse organizaciones como la Xunta pola Defensa de la Llingua o IX de Pravia, amás de personalidaes como Lluis Nel Estrada, director gastronómicu de Crivencar, o Miguel Fernandi, presentador del espaciu deportivu de RPA Tiempo Añadido y qu'empezó la so carrera profesional en Radio Sele.

La historia d'esta emisora, que tien l'eslogan de «la llingua nes ondes», ta marcada pola so situación llegal, al tratase d'una emisora comunitaria qu'empezó a emitir en febreru de 1986 ensin llicencia comercial. Sicasí, la radio algamó llicencia comercial en 1998 col gobiernu de Sergio Marqués, pero meses más tarde, l’Executivu de Vicente Álvarez Areces cambió les condiciones del concursu de llicencies con efeutu retroactivu y la cadena quedó ensin llicencia. Radio Sele recurrió énte los tribunales y el movimientu de reivindicación llingüística organizó una llucha cuasi ensin precedentes n'Asturies, colo que la emisora quedó como un símbolu de la defensa de los drechos llingüísticos de los asturfalantes.

Nel 2005, el xuez dio la razón a Radio Sele al declarar el cambiu del concursu como illegal y obligó a la devolución de la llicencia pa Radio Sele. Sicasí, el Gobiernu asturianu nun acató la sentencia y la cadena recurrió nel Tribunal Supremu, que dixo que les Comunidaes Autónomes teníen potestá dafechu pa regular el so espaciu radiofónicu. Les estorbises que vivió la emisora nun acabaron ehí y en setiembre del 2006 tuvo que pasar del 106.5 al 106.1 de la FM. El problema yera l'empiezu de les emisones regulares de RPA pol Día d'Asturies nel 106.4 y con muncha más fuercia, colo que RPA interfería na programación de la radio n'asturianu.

Con too, la situación que vive nestos momentos la emisora ta provocada principalmete pola decisión de la Xefatura de Comunicaciones d'Asturies, dependiente del Ministeriu d'Industria, Turismu y Comerciu. Asina, n'ochobre del 2011 y al traviés d'una notificación informóse a los vecinos del edificiu qu'agospia a la radio n'asturianu que taba emitiendo con una antena puesta de manera illegal, polo qu'había que retirala o la comunidá tendría que facese cargu d'una multa de 500.000 euros. Los responsables de la cadena n'asturianu tuvieron que desmontar l'antena y la emisión per FM tuvo qu'acabar. Tamién la publicidá, la principal fonte d'ingresos de cualesquier mediu de comunicación.

Fonte: Les Noticies