Idiomes y distancies

Lluís Xabel Álvarez
Igual qu’hai cuarenta años pillábemos la maleta pal viaxe máxicu y misteriosu que mos ponía en París o en Inglaterra agora los nuestros estudiantes tiren direuta y lliteralmente pa la China. Cambiaron les distancies: nun pues fiate de que te saquen d’apuros esi pariente o esa amistá que chapurrien los idiomes foriatos, agora si vas al Celeste Imperiu a estudiar tienes que dir con un nivel curiosu d’inglés, de la que deprendes el chinu mandarín y dalgo del chinu llocal de la provincia (pergrande) a la que llegues. De fechu paez que se vive en China un fenómenu llinguísticu de mases: el chinu oficial sigue cargáu d’arcaísmos y llugares comunes de la semántica maoísta mentes que crez un chinu xoven, alternativu y argullosu de garrar lo más posible de les formes y de la terminoloxía del inglés. Aparte de lo que cuenten les nuestres becaries y becarios esto dízlo l’autor Juan José Sebreli, que ye críticu y racionalista, asina que yo créolo. O seya que vamos a un ciertu billingüismu col inglés y eso nótase nes novedaes del enseñu universitariu: ta entamándose a cursar n’inglés dellos programes de títulos y llicenciatures. Qué bien. Col tiempu dalgo asemeyao pasará, digo yo, col otru billingüismu -el que cinca’l asturianu- cuando entama tamién na nuestra universidá esi famosu Minor d’enseñanza reglada de la llingua asturiana. Esi foi polo menos el camín de les otres llingües españoles, a traviés de la cooficialidá col castellán. Y eso llévame a la consideranza de les distancies nel casu concretu de la llingua desti país de nueso. El grupu activu y expertu del asturianismu atropó durante más de trenta y cincu años los elementos afayaízos pal llogru d’un estandar urbanu y técnicu de la llingua. Esi estandar ta fechu y preparáu pal usu oficial. La decisión ye ya puramente política. Nesti momentu, grosso modo , hai 23.000 escolinos de Primaria y d’Infantil que reciben clases d’asturianu y la cifra baxa a 5.000 na Secundaria y Bachilleratu. Nun hebo confianza de los poderes nin enfotu bastante de la base social pa más. ¿Camudarán les coses del próximu futuru? Les distancies equí comprometíes véoles yo nesti exemplu poéticu: al principiu diba de cola en cola del autobús a Pola d’Allande o a Cangas sintiendo de xemes en cuando con emoción antropolóxica un lloñe o un al debalu . Lejos y sin rumbo fijo, esto ye. Al final xubo a un avión que vien d’un destín cercanu, digamos Viena, y siéntome al llau d’una moza ventiañera cola que charro. Ella estudia una carrera científico-téunica y ye de Mieres. El menor acentu nel so castellán. Salme, ensin querer, una expresión asturiana y darréu la neña, ensin xigomencies, entama a falar l’asturianu que deprendió. Ye una neofalante. Una de les esperances de la supervivencia d’esta llingua y d'esti país.

Fonte: La Voz de Asturias