Piden más presencia del asturianu en Xixón

El Bloque por Asturies de Xixón pide dalgún xestu en política llingüística a l’alcaldesa de Xixón, Paz Fernández Felgueroso. Pa ello, dende la organización poĺítica faen dos propuestes rellacionaes col usu de topónimos yá oficiales nel Conceyu, como son el propiu nome de la ciudá y el de La Plaza’l Parchís, que ta a piques de quedar rematada dempués d’unes obres de remocique y que podría recuperar agora’l so nome tradicional, y oficial.

Estes son, en detalle, les propuestes del Bloque:


1. La primera, referente a les ´lletrones´ que van ser imaxe turística de la ciudá. Volvemos a recordá-y a la señora alcaldesa que`l topómimu Xixón tamién ye oficial nel nuesu conceyu, polo que la encamentamos a facer les xestiones necesaries pa que la ciudá disponga tamién d`otres ´lletrones´ con ésti otru topónimu, pa que pueda ser imaxe de la nuesa ciudá y pa que, per un lláu los y les xixoneses vean espeyada la nuesa realidá llingüística, y d`otru lláu aquelles persones que nos visiten conozan esa realidá y seyan conscientes d’ella.

2. La segunda refiérese a una cuestión de ´toponimia popular´. Coles obres yá casi remataes y a piques de la so reinaguración, pidímos-y a Paz Fernández y al so equipu de gobiernu que gueten y lleven a la realidá la fórmula pa que la Plaza del Institutu vea reconocida, mediante una placa o cualesquier señal indicativa, que`l nome popular d`esta plaza y pol que la conoz tol mundiu, tanto habitantes como visitantes del conceyu, ye`l de ´Plaza`l Parchís´.Unos xestos que califiquen de “bien cenciellos” y que’l Bloque por Asturies vería como “perpositivos pa siguir afondando na política de normalización llingüística que dende hai unos años vien desenrrollando esti conceyu”.

Fonte: Asturnews