22/2/11

L'ALLA considera pergrave refugar incluyir l'asturianu nel Decretu d'Especialidaes de Mayestros


Posición de l’ALLA ente’l procesu de tramitación del Decretu d’Especialidaes de Mayestros del Ministeriu d’Educación.

Como sabe la opinión pública asturiana y les fuerces polítiques parllamentaries de la Xunta Xeneral del Principáu d’Asturies, l’Academia de la Llingua Asturiana vien calteniendo cuantayá la necesidá de que’l profesoráu de Llingua Asturiana exerciente en centros públicos d’Educación Primaria y Secundaria cunte cola Especialidá Docente de Llingua Asturiana.

Nel comunicáu asoleyáu, l'Academia diz que "tal especialidá ye la única garantía de qu’esti profesoráu pueda acceder, n’igualdá de condiciones que’l restu, a una estabilidá profesional pente medies de los pertinentes concursos d’oposición y treslláu. Ello significaría, al empar, un importante reblagu nel asitiamientu alministrativu del área de Llingua Asturiana dende’l puntu de vista organizativu y, mesmamente, dende la perspeutiva de la rentabilidá y axuste económicu nun momentu de crisis fonda como l’actual. Nun hai qu’escaecer, amás, que’l nivel de formación universitaria esixíu a esti profesoráu ye, agora y darréu de la puesta en práutica na Universidá de les directrices del Espaciu Européu d’Educación Superior (EEES), plenamente homologable al del restu de los coleutivos docentes".

L'Academia desplica pormenorizadamente na so nota de prensa'l fechu de que'l Ministeriu d’Educación ta a puntu d’espublizar un nuevu Decretu d’Especialidaes pa Mayestros nel que s’afita que “tendrán la consideranza d’especialidaes del cuerpu de Maestros les propies de la llingua co-oficial naquelles comunidaes autónomes qu’asina lo tuvieron reglao” y que "magar esti enunciáu nun torga les posibidaes llegales de la llingua asturiana (nada se diz a la escontra de les llingües non oficiales), el sindicatu de profesores STES (representáu en Madrid por Vicent Esteve) plantegó apocayá al ME na mesa sectorial d’Educación una enmienda al articuláu pa que les llingües non oficiales, pero con especial proteición y presencia curricular oficial, pudieren ser, tamién, reconocíes como “especialidá docente”. A lo que paez, la respuesta del Miguel Soler García (Direutor Xeneral de Formación Profesional del Ministeriu d’Educación) foi qu’ello nun yera necesario porque, puestos en contautu col Principáu d’Asturies, les autoridaes autonómiques asturianes refugaben esa especialidá".

L'Academia de la Llingua Asturiana quería güei dexar perafitao que "de ser ello cierto, sedría un fechu gravísimu, non solo porque’l Gobiernu del Principáu d’Asturies taría faciendo una dexación ensin precedentes de les posibilidaes llegales de la enseñanza del asturianu, sinón tamién dende’l puntu de vista de les implicaciones que cinquen a la credibilidá del executivu asturianu, darréu que son xustamente los responsables educativos d’Asturies los qu’apregonen que tal especialidá nun pue facese porque “Madrid nun dexa”.

L’Academia, nesti sen y como muérganu tutelar de los derechos llingüísticos de los asturianos, da anuncia de que solicitará un aconceyamientu urxente cola Conseyería d’Educación del Gobiernu del Principáu y treslladará la so posición a toles fuerces polítiques parllamentaries, entamando pola FSA-PSOE, encamentando a toes elles qu’estes cuestiones seyan teníes en cuenta a la hora d’ellaborar los respeutivos programes eleutorales col envís de qu’esta llamentable situación alcuentre definitiva solución con marcu llegal y alministrativu estable y non discriminatoriu.

Fonte: Asturnews

4 comentarios:

  1. Otra vegada, otra zancadiella más en contra l'asturianu por parte del grupu políticu encabezáu pol so enemigu Areces que da los síntomes de professar un alerxa... o meyor un odiu visceral a la llingua. Pero les elecciones de mayu tán mui cerca; atención a lo que votamos, y en casu de dulda, cuesa abondo razonable, ¡¡¡astención xeneral!!! que paez lo más prudente, vistu lo visto. El despreciu masivo de la xente contra'l despreciu de los políticos asturianos a la so xente y a la so llingua.

    ResponderEliminar
  2. Bona idea Cubiella. Ye la respuesta que merez esta banda polos sos ésitos: entama lladonos Marea, Huca, Musel, autovía Cantábricu y lliberación Güerna, AVE, reconocimientu de la llingua, etc, etc, va haber que ponelo en práctica como sabia llección maxistral del pueblu llanu y soberanu a quien-y lo merez abondo.

    ResponderEliminar
  3. mayestra d'asturianu23 de febrero de 2011, 17:52

    Paez que la Conseyería d?Educación d'Asturies da marcha atrás, rectifica -como ye constume nel pesoe- y va sacar esti branu oposiciones pa mayestros y mayestres, pero tá nel aire si contemplará la especialidá d'asturianu que tanto de falta fai.
    Hai que siguir primiendo como hasta agora n'especial los sindicatos incluyíu UXT que siempres ye'l más fréngole pa enfrentase s los amos o seya'l psoe.

    ResponderEliminar
  4. Lo que sí que parece ya más cierto es que el Gobierno asturiano tras su enésima rectificación -parece que funcionan a base de globosondas y no de una planificación estudiada y meditada según las necesidades reales- y siguiendo el ejemplo de otras autonomías "...dije diego", apunta ahora sacar a oposiciones para maestros solo el 30% de las vacantes ocasionadas por jubilaciones o sea unas 120 plazas, cantidad que parece del todo insuficiente teniendo en cuenta que no parecen contemplar la especialidad de Llingua Asturiana ¿Cuál será el auténtico desenlace de este entuerto -el enésimo- de la Consejería de Educación? Y es que "nuestro querido presidente" parece que se quiere despedir de la poderosa poltrona con polémica y practicando la política de "tierra quemada", ¿qué esperará recibir a cambio tanto él como los que él deja dentro de su insonorizada y aislada torre de marfil? error tras error que en mayo pagarán muy caro.

    ResponderEliminar

Los comentarios tán pendientes de moderación. Espublizaránse lo primero dable.