7/2/11

Finalistes del Premiu al Meyor Cantar en Llingua Asturiana


Premiu al Meyor Cantar en Llingua Asturiana.

La direutora xeneral de Política Llingüística, Consuelo Vega, dio a conocer los nomes de los cinco finalistes del Premiu al Meyor Cantar en Llingua Asturiana 2011. Los artistes que van competir por esti gallardón, na convocatoria d’esti añu, van ser Skama la Rede (con «Condenáu»), Falanoncaduca (con «Sele sound system»), Verdasca (con «Entre ríos y entre soutos»), Corquiéu (con «Alma valera») y Blima (con «Señaldá»).Tamién anunció que la gala d’entrega va facese nel Auditoriu Teodoro Cuesta de la Casa la Cultura de Mieres, concretamente’l sábadu 19 de febreru. Ellí van tar los cinco finalistes pa interpretar en direutu’l tema seleicionáu, y conocer depués el nome del ganador. Como ramu al actu, el ganador del añu pasáu, el grupu Xera, va ufiertar un conciertu.

Los cinco finalistes d’esta edición sepártense en dos estilos concretos: el rock y el folk. Ente toos ellos ufierten una visión xeneral de la música fecha n’asturianu anguaño, con nomes mui conocíos d’ella y otros muncho más nuevos.

El Premiu al Meyor Cantar en Llingua Asturiana instituyóse nel añu 2007 pola Conseyería de Cultura y Turismu col oxetivu de promocionar y favorecer la creyación musical orixinal nesi idioma. La convocatoria ta abierta a toos aquellos grupos y solistes que nel añu anterior editaren dalguna canción n’asturianu (o en gallego-asturianu), sía del estilu que sía, cola única condición de que tanto la música como la lletra tienen que ser orixinales dafechu. Los ganadores de les ediciones anteriores foron «Azul y gris» (Toli Morilla), «Nosh» (Herbamora), «La nada y tu» (Alfredo González) y «Tierra» (Xera).

Fonte: Estaya d'asturianu

No hay comentarios:

Publicar un comentario

Los comentarios tán pendientes de moderación. Espublizaránse lo primero dable.