L’ALLA reclama a González qu’acuda a Madrid pa negociar con urxencia la especialidá d'asturianu tres el refugu de Wert a la so reconocencia

Ana Cano y Xosé Antón González Riaño

  Victorina Fernández, direutora xeneral de Formación Profesional, Desarrollu Curricular y Planificación Educativa, anunció esti miércoles que’l ministru José Ignacio Wert nun reconociera la especialidá docente d’asturianu que demandara’l Gobiernu del país. L’ALLA reclama a la conseyera Ana González qu’acuda “espresamente a Madrid a negociar esta cuestión”.

  Na tarde d’ayeri, Fernández anunciaba nuna rueda de prensa previa a la Conferencia Sectorial de Educación convocada nel Ministeriu d’Educación, Cultura y Deporte pa conocer la opinión de les comunidaes autónomes sobre’l Proyeutu de Decretu de les Especialidaes Docentes d’Educación Secundaria, que dichu ministerio nun incluyera la Llingua Asturiana y el Gallego-asturiano, nel so ámbitu, dientro del decretu d’especialidaes de la Llei Orgánica de Meyora de la Calidá Educativa (LOMCE). Darréu, apuntó que “n’Asturies hai un grupu importante de docentes a quienes tenemos que dar una especialidá” y que “del mesmu mou que se permite desarrollar les respeutives especialidaes a les comunidaes autónomes que cuenten con una llingua cooficial, pidimos que tamién lo permitan cola llingua asturiana, que ye un bien protexíu y con una presencia importante na ufierta educativa”. Por último, señaló que “puesto que la competencia pertenez a la comunidá autónoma, el ministeriu habría de danos la posibilidá de que podamos cumplir dafechu colos nuesos compromisos cola comunidá educativa”.

  Tres conocer la noticia, l’Academia de la Llingua Asturiana (ALLA) convocó a los medios de comunicación con urxencia pa dar a conocer la so postura.  La institución académica quita responsabilidá a Fernández, recién nomada nel cargu, pero sí critica la “inxenuidá” del Gobiernu con esta cuestión y recordó que yá avisara a la conseyera qu’un asuntu “tan delicáu como ésti esixía una xestión personal y decidida de la propia titular de la conseyería”, señaló Ana María Cano, presidenta de l’ALLA. “Ésti ye un tema qu’interesa a Asturies. Ye una inxusticia que venimos sufriendo dende fai munchísimos años y nun se pue facer una dexación de funciones. Esto hai que negocialo al máximu nivel y col mayor de los convencimientos si realmente queremos que salga p’alantre. Entendemos que sería la conseyera d’Educación  la que tendría que dir espresamente a Madrid a negociar esta cuestión porque nun ye lo mesmo facelo al máximu nivel que mandando a una persona que tea por debaxo de la conseyera”, demandó Cano, qu’aguarda que González o’l propiu presidente “tomen cartes nel asuntu y pidan una entrevista urxente col ministru pa solucionar esti tema. Yo toi convencía de que si se plantega como se tien que plantegar, el ministeriu nun va tener nengún problema n’aceptar la especialidá”.  

Desigualdá col restu de profesionales del enseñu

  Cano quixo recordar que “hai unos profesionales que tán exerciendo una profesión regulada por llei, que tienen una titulación oficial reconocía nel Estáu, y que de nenguna de les maneres pueden tar en desigualdá de condiciones respeuto a los otros profesionales de la enseñanza”. Estos profesores condenaos anguaño a la interinidá, nel casu d’algamase la tan demandada especialidá, podríen participar en concursos d’oposición o tresllaos al igual que’l restu de los coleutivos docentes.

  Pela so parte, Xosé Antón González Riaño, vicepresidente de l’ALLA, reseñó que “la decisión nun implicaría al ministeriu, que nun tien por qué poner dificultaes si ve convinción per parte del Gobiernu d’Asturies. La xestión nun la tien que facer el ministeriu, sinón que correspuende a la comunidá autonóma dende’l puntu de vista organizativu y de los recursos. ¿Por qué va dicir que non el ministeriu a esa demanda? Lo que se necesita ye xustamente treslladar qu’hai esa necesidá educativa y organizativa n’Asturies”. Pa finar, el responsable d’Educación de la institución esplicó que l’aprobación de la especialidá ye dalgo “meramente téunicu; ye un decretu, nin siquier una llei, nel qu’hai qu’amestar un párrafu” que señale que “les otres llingües non oficiales pero con reconocimientu xurídicu como llingua y implantación curricular, podrán tener especialidá si hai necesidaes oxetives que lo xustifiquen”.

  L’ALLA, que s’ufierta a collaborar nel supuestu alcuentru ente’l ministerio y el Gobiernu “pa encontar téunicamente la discusión y ver de llograr una redaición afayadiza del Decretu d’Especialidaes que respete los intereses profesionales del profesoráu de Llingua Asturiana, tien solicitada una entrevista “urxente” cola conseyera y tien pensao aconceyar colos sindicatos que tán representaos nel Conseyu Escolar del Estáu, que yá diera’l preste a la especialidá y va tratar otra vuelta l’asuntu’l día 3 de febreru. Tamién pretende aconceyar col PP, “que tien inxerta esta reconocencia de la especialidá nel so programa eleutoral”, y col restu de fuercies polítiques.

Iniciativa pol Asturianu califica la situación de “tomadura de pelo”

  La organización Iniciativa pol Asturianu tampoco nun tardó en responder a la negativa de Wert a la especialidá, decisión que calificó de “tomadura de pelo” pol fechu de que “nel programa del Partido Popular del 2012, el de les últimes eleiciones autonómiques, la formación lleva la promesa de reconocer” dicha especialidá. “La situación d'anguaño ye d'una plantiya de profesoráu de Llingua Asturiana inestable, precarizada y que nun gana esperiencia, yá que los profesores fuxen en cuantes-yos ye posible hacia otres especialidaes onde sí pueden algamar una plaza, al tar la reconocida la especialidá pol Ministeriu d'Educación. Esto supón una importante perda na calidá de l'asignatura y una inestabilidá na mesma, pese al importante sofitu de les families asturianes, matriculando a los sos neños de forma mayoritaria en Llingua Asturiana”, alvierten.

  Por esti motivu, el coleutivu que trabaya na normalización del idioma solicita al PP “que faiga cumplir el so programa” y a la conseyera “que dea una respuesta contundente al Gobiernu d'España y reclame la solución d'esta situación que s'allarga yá más de trenta años, dende que l'asturianu llegó a los primeros centros educativos públicos. La máxima responsabilidá de que la situación siga siendo de precariedá ye de l'alministración autonómica y tien de demostrar la so voluntá nidia d'algamar esti oxetivu xustu siendo clara y enfrentándose al Gobiernu central en tolos ámbitos posibles”.                                                                    Fonte: asturies.com