Una modesta zarzuela asturiana

 

Cartelu de la zarzuela asturiana "La promesa"

   Presentóse’l xueves 8 de xineru nel Teatru Xovellanos la obra ganadora del I Premiu de Teatru n’asturianu Pachín de Melás. El premiu fue pal conocíu grupu de teatru “Nun Tris”, capitanéau por Antón Caamaño, bon conocedor del mundu de les tables y meyor persona. La obra en custión fue la recuperación y actualización de la zarzuela d’Eduardo Martínez Torner  La Promesa.

   Fuimos, pues, al estrenu cola garantía del bon facer del musicólogu ovetense y la veteranía de los teatreros de “Nun Tris”, ensin embargu la obra nun tuvo l’altor esperáu. Munchos fueron los fallos que cualisquier aficionáu caltriaría na más sentase na butaca. El  primeru una especie de reportax como de vidiu-aficionáu que se  visionaba sobre’l telón, y nel cuál actores y responsables de la obra falaben alrodiu d’ella. Una cosa bastante probe na que, amás, salvo’l propiu Caamaño, toos falaben en castellán, cuando la obra taba anunciada como n’asturianu normativu. Sonaba a aquello del monologuista que s’espresa en perfeutu castellán hasta que principia’l monólogu. 
   Diglosia de llibru.  En cuantes a la obra en sí, la parte de los diálogos falaos llegaben nun tonu mui baxu al públicu, polo que se perdía gran parte d’ellos. Tábemos na fila 14 y sentíase too bastante mal. Abaste dicir que malpenes si entendimos el final de la obra, cuando apaecen n’escena una pareya de la guardia civil, porque lo que dicen los autores nun llega con claridá. Tampoco la espresión n’asturianu resulta convincente, con munches mecies y  pocu comencimientu espresivu, a nun ser Fernando Marrot nel papel de Tolina.

   En cuantes a la parte musical, tuvieron bien los coros del Orfeón Gijonés, y ficieronse simpáticos y bonos actores la pareya cómica Celuca (Margarita Sierra) y Silvino (Pablo Romero) que, amás, intervinieron muncho. Prestónos la voz de la protagonista Nela (Vanesa Touza), clara y bien timbrada, anque yera de les que peor se-yos entendía cuando falaba… y poco más. El barítono que facía’l papel de Miguelón, amás de tener poca voz taba fuera de tonu cuasi siempre, y el tenor que facía de Vitor tien una voz agradable pero mui llimitada.

   En fin, hai qu’aplaudir el trabayu y l’esfuerciu de tolos componentes de la obra, y l’interés por rescatar a un autor asturianu del escaezu, pero pal futuru habrá que cuidiar más otros detalles pa qu’esi esfuerciu se vea recompensáu  por un merecíu ésitu.                                 Fonte: wasturies.com / ww.trabayudecampu.com