N’Ast pide más atención a los informes internacionales sobro l’asturianu

L’organismu Eurolang / European Language Equality Network (ELEN) ta acabante d’asoleyar un nuevu informe nel que fae repasu a les discriminaciones y ataques que sufren los falantes de llingües minoritaries nel Estáu español.

No que cinca a la llingua asturiana, l’informe critica bien d’ello a l’Alministración asturiana –Gobiernu del "Principado"– por poner la “escusa llegal” de la non oficialidá del asturianu pa nun emplegalu de cara al ciudadanu nun cumpliendo siquiera colos mínimos afitaos na probetaya Llei d’Usu de 1998. Como casos concretos, ELEN señala la dificultá de coleutivos por poder llegalizase emplegando l’asturianu, de partíos políticos por presentar les candidatures elleutorales na mesma llingua y les dificultaes de los escolinos que la quieren cursar nes escueles ya institutos.

Poro, dende l’Asociación Cultural N’Ast "encamentamos al Gobiernu del "Principado" qu’atienda daqué a estos informes internacionales, que de xemes en cuandu se vienen asoleyando dende estremaos organismos, y nos que nun se fae otra cosa que tirá-y de les oreyes por nun garantizar los drechos llingüísticos de los asturianos".

Pa N’Ast, "la meyor manera de tornar la situación espeyada por informes como’l d’ELEN ye precisamente declarar la oficialidá de la llingua asturiana, como primer pasu pa una dignificación, normalización social y caltenimientu del asturianu. Somos conscientes de que la oficialidá por sí sóla nun garantiza nada, pero ye per onde s’entama a iguar esta situación tan llaceriosa".

Fonte: Infoasturies