10/1/15

Iniciativa pol Asturianu demanda estabilidá pa los servicios de normalización llingüística


L’Asociación de Trabayadores de la Normalización Llingüística condergó recién “la situación d’inestabilidá y precariedá llaboral llaceriosa” d’esti coleutivu por mor de la “xestión pública pésima de conceyos y Principáu”, ente otres coses.Iniciativa pol Asturianu sofita les sos reclamaciones y demanda a Cultura convenios pa caltener estos servicios y a los ayuntamientos, responsabilidá.
La organización de defensa del idioma considera a estos muérganos “perimportantes pa la normalización de la llingua asturiana, yá que cada añu miles de ciudanos y cientos d'entidaes públiques y privaes, usen estos servicios pa sofitar l'apueste pol usu del asturianu na so actividá” y considera que la so estabilidá permitiría “llevar a alantre polítiques llingüístiques organizaes y continuaes nel tiempu”. Por esti motivu, demanda a la Conseyería d’Educación, Cultura y Deporte, responsable de les competencies de Política Llingüística, “que ponga en marcha los convenios necesarios pa caltenelos nel tiempu, y a los conceyos, que se responsabilicen de los servicios de normalización como parte propia que son de la so alministración, destinando los recursos necesarios pa llevar alantre la so actividá ensin una dependencia absoluta de la financiación del Gobiernu d'Asturies, como pasa na mayor parte de los casos”.
Por último, Iniciativa pol Asturianu recuerda qu’estos servicios de normalización, “inclusive nes circunstancies de precariedá presupuestaria y llaboral que viven, son ferramientes bien útiles pa la normalización del idioma nel ámbitu de los conceyos, mesmo de forma interna, na alministración, como faciendo serviciu direutu a los ciudadanos”.
Fonte: Asturies.com

No hay comentarios:

Publicar un comentario

Los comentarios tán pendientes de moderación. Espublizaránse lo primero dable.