Skanda protagoniza la portada del Anuariu de la Música Asturiana del 2014

Portada del Anuariu de la Música Asturiana 2014

   Yá ta a la venta l’Anuariu de la Música Asturiana del 2014. Skanda, que distribúi esta selmana’l llibru-CD-DVD ’18’ cola grabación d’un conciertu especial de la banda en Mieres, protagoniza la portada de la espublización de Goxe Producciones.

   L’anuariu suma con ésta dieciséis ediciones col oxetivu de facer alcordanza “de l’actividá producida nel añu últimu dientro del campu de la música d’espresión asturiana: la tradicional, aquella que la reellabora (folk y demás derivaos) y la qu’utiliza l’asturianu independientemente del estilu”. D’igual forma, trata fondamente temes y cuestiones rellacionaes cola música de nueso y cuenta con una editorial de relevancia nel que s’analiza la situación actual del sector. Nesta ocasión, firmada por Xune Elipe, lleva’l títulu de ‘La voluntá de ser y siguir de la música asturiana’ y nella’l direutor de la revista señala que “echando una güeyada a los anteriores númberos vemos cómo, por desgracia, poco de lo que se propón nellos se fixo realidá, sobre too no que se refier al deséu d’una verdadera política musical por parte del Gobiernu d’Asturies, que sigue ensin da-y l’atención afechisca a esti sector, con acciones insuficientes, tímides y ensin continuidá, sacante dalguna escepción honrosa, como la creación del Premiu al Meyor Cantar. Nesti sen, siguimos naguando por eses llinies d’actuación de los poderes públicos que lleven al oxetivu final de llograr visibilidá (interior y esterior), estabilidá y profesionalidá a esta rama de la industria cultural nel nuestru país”.

   Esta edición cuenta tamién con dos informes titulaos ‘Cómo montar un festival y nun morrer nel intentu’ y ‘Nuevu folk asturianu’; reportaxes como ‘Música, televisión y neños’; cróniques sobre’l III Sol Celta d’Avilés y el Premiu al Meyor Cantar 2014; entrevistes a Tejedor, Skama la Rede, Borja Baragaño y Os Folkgazáis; recoyida de material como ‘La historia del gaiteru y el conde ganaderu’; y artículos d’opinión. Tamién hai güecu pa la seición ‘Collecha’, que recueye toles producciones discográfiques, bibliográfiques y audiovisuales del 2014 rellatives a la música asturiana. Como ye vezu, l’anuariu complétase con un discu resume de los álbumes espublizaos nesi añu, con dieciséis temes separtaos por estilos: tonada, folk, bandes de gaites, canción d’autor y rock.

‘18’      La portada d’esti númberu ta dedicada a Skanda con una semeya del conciertu de Mieres n’avientu del 2013 que recueye’l llibru-CD-DVD ‘18’ (Algamar Producciones), que precisamente va distribuyise esta selmana per Asturies. Con motivu de celebrar los 18 años de vida de la banda, los mierenses decidieron xuntase con dellos músicos asturianos pa recordar la so trayeutoria dende’l 1996. Asina, participaron nesta cita especial Alfredo González, Anabel Santiago, la Banda Gaites Villa de Mieres, la Big Band Mieres, Berto Argayaes, el Corín de la Escuela de Música de Mieres, el Coru Mineru de Turón, Dani Álvarez, Imanol Núñez, Juan Yagüe, Marisa Valle Roso, Pablo Moro, les Pandereteres de Fitoria y Silvia Quesada.

   Esti trabayu de la banda, que yá trabaya no que va ser el so sestu discu d’estudiu, resultó nomináu recién al ‘Meyor discu folk’ dientro de los Premios AMAS, gallardón al que tamién aspiren Cerezal por ‘Camín’, Mapi Quintana y Elías García por ‘Severina’ y la Banda Gaites Candás por ‘Güei’.

Puntos de venta de la revista       La xente interesao en facese col Anuariu de la Música Asturiana correspondiente al 2014 pue atopalu nel Chigre L’Esperteyu y la Tienda de Comerciu Xustu L’Arcu la Vieya, n’Uviéu; el Trisquel, la Llibrería Paradiso y La Revoltosa, en Xixón; El Cafetón y El Cabanón, n’Aviés; la Llibrería Palabras de Caramelo, en Candás; L’Abellugu y Habana, en Mieres; La Esbilla y Ringo Rango, en Villaviciosa; y El Sabil, en Santu Adrianu.                                                        Fonte: asturies.com